Biblioteka Kombëtare e Kosovës “Pjetër Bogdani” nga sot e deri më 12 tetor 2025, organizon edicionin e 22-të të Javës së Bibliotekës, që këtë vit merr përmasa ndërkombëtare.
Për herë të parë, në këtë ngjarje marrin pjesë ekspertë nga bibliotekat kombëtare më të mëdha të rajonit dhe Evropës, duke sjellë përvoja unike përmes prezantimeve mbi praktikat dhe zhvillimet më të reja në fushën e bibliotekarisë, transmeton klankosova.tv.
Përmes programit ndërkombëtar, ngjarja sjell përfaqësues të Bibliotekës Kombëtare të Shqipërisë, Bullgarisë, Turqisë, Maqedonisë së Veriut si dhe prezantimin e veçantë të bibliotekës personale të profesorit austrian, Karl Kaser.
Me temën “Biblioteka mes traditës dhe inovacionit”, këtë vit aktiviteti vjen me një koncept të ri, duke vënë theksin te roli i bibliotekës si urë lidhëse mes trashëgimisë kulturore dhe zhvillimeve moderne.
Në edicionin e 22-të të Javës së Bibliotekës do të mbahen shumë aktivitete si:
Lansimi i rrjetit bibliotekar të Kosovës (48 biblioteka të lidhura në një sistem të unifikuar)
Ekspozita “Trashëgimia orientale në Kosovë” me dorëshkrime dhe botime të rralla nga fondet e Bibliotekës Kombëtare
Sesione shkencore mbi: digjitalizimin, ruajtjen e trashëgimisë, teknologjinë dhe identitetin kulturor, promovimin e leximit, përkthimin e letërsisë shqipe dhe qasjen ndërkombëtare, të drejtën e autorit dhe rolin e bibliotekave
Diskutime mbi Inteligjencën Artificiale dhe bibliotekat, me ekspertë kombëtar
Promovim i katalogut “Thesare të Bibliotekës Kombëtare të Kosovës”
Përkujtim për Martin Camajn në 100-vjetorin e lindjes
Program kulturor e letrar me lexime, promovime librash dhe diskutime me shkrimtarë e përkthyes
Shfaqje filmash nga kinematografia kosovare çdo mbrëmje në Bibliotekën Kombëtare
Java e Bibliotekës do të shtrihet edhe në qytete si Prizren, Pejë, Gjakovë dhe Suharekë, me aktivitete të posaçme për fëmijë, të rinj dhe lexues të apasionuar./Klankosova.tv
●●●
KKSHKRIMI NGA
Klan Kosova
Editorial nga Klan Kosova — ndjek lajme dhe zhvillimet e tjera kryesore të vendit.