Më shumë se 900 mijë palestinezë janë zhvendosur në Gaza gjatë dy javëve të fundit

Më shumë se 900 mijë njerëz, afërsisht 40% e popullsisë së Gazës, janë zhvendosur në dy javët e fundit ndërsa bombardimet izraelite vazhdojnë në pjesën më të madhe të enklavës.

Kështu tha të hënën zëdhënësi i Kombeve të Bashkuara, Stephane Dujarric, raporton CNN, transmeton Klankosova.tv.

Bombardimet izraelite janë shoqëruar me inkursione tokësore dhe luftime intensive, veçanërisht në pjesën lindore të Rafahut dhe Jabalya, shtoi ai.

Dujarric, tha se nga palestinezët e zhvendosur, 812 mijë janë nga Rafah dhe mbi 100 mijë nga Gaza veriore.

"Deri më sot, më shumë se 75% e Rripit të Gazës – rreth 285 kilometra katrorë – është nën urdhra evakuimi mes armiqësive në rritje”, tha Dujarric.

Ai shtoi se zhvendosja në shkallë të gjerë ka rezultuar në kushte të rënda jetese për shkak të mungesës së madhe të strehimoreve, pa tenda dhe shumë pak sende strehimi të disponueshme për shpërndarje.

Individët e zhvendosur po kërkojnë strehim në hapësira të hapura, ndërtesa të dëmtuara dhe toka bujqësore në Khan Younis dhe Deir al-Balah.