Mbyllet pjesa e parë në Gjilan, Llapi në epërsi ndaj Dritës

Me goditjen e saktë me kokë pas krosimit të Valmir Veliut, Blendi Baftiu i dha avantazhin Llapit në Gjilan në minutën e 22-të, në duel ndaj Dritës. Ky ishte edhe goli i vetëm i pjesës së parë, raporton Klankosova.tv. Gjilanasit që janë liderë të kampionatit, me fitore eventuale sot, do të shkëputeshin plot 5 pikë nga ndjekësi i parë, Ballkani. “Xhebrailat” nuk shkuan mbrëmë më shumë se një barazim 1-1 kundër Prishtinës, andaj “Intelektualët” e kanë mundësinë që të krijojnë diferencë edhe më të madhe, para se të dielën të udhëtojnë në Suharekë për t’u përballur me kampionin aktual. Nga ana tjetër ekipi nënkampion i Kosovës, ndodhet në zonën e barazhit, pasi me 16 pikë, ka prapa vetëm Ferizajin dhe Feronikelin’74, njofton Klankosova.tv. Për t'u rikthyer në garë për pozitat e para, llapjanët duhet të lënë gjurmë në duelin e sotëm dhe deri tani kanë dhënë sinjale se kjo mund të ndodh. Drita – Llapi po transmetohet direkt në kanalin Sport 1 të platfromës kryesore shqiptare, Art Motion.