Mbiemri i këtij basketbollisti do t'i vë në siklet komentatorët kosovarë

Klubi i basketbollit Vëllaznimi, e ka prezantuar transferimin e ri. Por, mbiemri i këtij zor se do të mund të mbahet në mend. E më së vështiri duket se do ta kenë komentatorët sportivë në Kosovë. Bëhet fjalë për qendrën Craig Osaikhwuwuomwam. Ai është 33 vjeçar dhe është i gjatë dy metra e 11 centimetra. "Ai ka një eksperiencë të gjatë në top kampionate evropiane ku për 10 sezone luajti në elitën e basketbollit holandez për skuadra si Apollo Amsterdam, Nijmegen Magixx, LWD Basket, Donar Groningen dhe Lamstede Hammers, kurse luajti edhe në elitën e Republikës së Çekisë për BK Armex dhe për top ekipin estonez, Talinna Kalev", thuhet në njoftimin e klubit nga Gjakova transmeton Klankosova.tv "Craig njihet si lojtar me karakteristika të shumëanshme dhe me shumë dimensionalitet në sulm, duke pasur shkathtësi asistuese, ashtu si ato defensive. Emri i tij është i vështirë, ashtu siç do ta kenë të vështirë ekipet kundërshtare ta ndalin atë", thekson klubi i basketbollit Vëllaznimi.