Mbështetet panairi i Artizanateve të Malësisë së Gjakovës

Në një komunikatë të dërguar për media, thuhet se nën kryesimin e kryetares së Gjakovës, Mimoza Kusari - Lila, u mbajt mbledhja e radhës e bordit të drejtorëve ku janë shqyrtuar 8 pika të rendit të ditës. Në këtë mbledhje është paraqitur kërkesa për bashkëfinancimin e aktiviteteve për Panairin e Artizanateve të Malësisë së Gjakovës nga Drejtoria e Zhvillimit Ekonomik. Panairi planifikohet të mbahet me datat 7-8 Tetor 2016 në hapësirat e Çarshisë së Madhe në Gjakovë ku do të prezantohen artizanatet dhe zejet tradicionale përfshirë ushqimin tradicional nga qyteti i Gjakovës dhe bashkive Has dhe Tropojë, njofton Klan Kosova. Poashtu është miratuar edhe kërkesa nga Drejtoria për Urbanizëm dhe Mbrojtje të Mjedisit, u shqyrtua edhe kërkesa nga Zyra për Barazi Gjinore për ndarjen e një linje të veçantë buxhetore për nevojat e aktiviteteve të kësaj zyre në bashkëpunim me grupin e grave asambleiste. Kusari- Lila shtoi gjithashtu se Gjakova ka qenë e para e cila ka bërë buxhetimin gjinor duke përkrahur gjithmonë aktivitetet e grave në fusha të ndryshme, thuhet në një komunikatë dërguar për media, njofton Klan Kosova.