Lajmet e fundit
Ish-kongresmeni nga Florida, Matt Gaetz, ka vendosur të tërhiqet nga kandidimi për postin e Prokurorit të Përgjithshëm në administratën e ardhshme të Donald Trump.
Ky zhvillim vie, pas debatit mbi publikimin e një raporti hetimor që përfshin akuza për sjellje të pahijshme seksuale dhe përdorim të substancave të paligjshme, transmeton klankosova.tv.
Në një postim në platformën X, Gaetz theksoi se polemikat lidhur me kandidaturën e tij po ktheheshin në një “shqetësim të padrejtë” për punën e administratës së re dhe vendosi të tërhiqej për të shmangur një “përplasje të gjatë dhe të panevojshme” në Washington.
Raporti, i cili është në qendër të debatit, përmban gjetjet e një hetimi të nisur në vitin 2021 nga Departamenti i Drejtësisë.
Ky hetim u përqendrua në akuzat për trafik seksual, përfshirjen e një të miture dhe përdorim të paligjshëm të drogës.
Edhe pse Departamenti i Drejtësisë nuk ngriti akuza ndaj Gaetz, raporti mbetet një çështje e debatueshme dhe ka ngritur pikëpyetje mbi emërimin e tij në një rol kaq të rëndësishëm.
Siç raporton BBC, Gaetz ka mohuar në mënyrë të vazhdueshme akuzat, duke i quajtur ato një “sulm politik”.
Megjithatë, përfshirja e tij në këtë raport ka bërë që shumë zyrtarë republikanë dhe demokratë të shprehin shqetësimet e tyre për kandidaturën e tij.
