Lajmet e fundit
Kryesuesi i Këshillit Prokurorial të Kosovës (KPK), Jetish Maloku, ka folur për vettingun në sistemin e drejtësisë në një konferencë për medie.
Ai tha se kanë pasur takime të ndryshme me faktorët e pushtetit dhe përfaqësuesit e Ministrisë së Drejtësisë kur është diskutuar për këtë çështje.
Maloku u shpreh se nuk e mbështesin këtë proces të vettingut të paraqitur nga ministrja Albulena Haxhiu. Kjo pasi sipas tij, nuk i sjell dobi as sistemit të drejtësisë e as qytetarëve të Kosovës.
“Ju e dini ne kemi qenë aktiv prej fillimit në Grupet Punuese që i ka formuar Ministria e Drejtësisë. Kemi pasur përfaqësuesit tanë aty. Kanë qenë aktiv. Edhe në takimet e drejtpërdrejta me ministren e Drejtësisë apo faktorët e tjerë”.
“Nuk i përkrahim një proces të vettingut klasik pasi ka më shumë pasoja sesa që i sjell dobi KPK-së. Nuk e di çfarë dobie i sjell qytetarit një vetting që më tepër ka më shumë pasoja sesa dobi. Nuk jemi dakorduar për një vetting të tillë”, ka thënë ai, raporton EO.
Për Malokun, nuk është parë racional ky vetting dhe i njëjti mendim qoftë nga Këshilli Prokurorial apo ai Gjyqësor nuk ndryshon as ditën e sotme.
“Ne kemi dhënë mendimet tona që kemi qenë në gjendje të bëjmë ndërhyrje ligjore, të ndryshojmë ato ligje që mendojmë se janë pengesë në rrugë e sipër e të forcojmë mekanizmat e brendshëm në KPK dhe KGJK dhe pse mos ta bëjmë një reformë tonë të brendshme pa pasoja por gjithnjë edhe në dobi të sistemit dhe qytetarëve tanë. Një vetting të tillë me ndryshime kushtetuese s’e kemi parë të arsyeshëm dhe asaj i qëndrojmë edhe sot dhe të njëjtin mendim e kemi”, tregoi ai para gazetarëve, teksa shpalosi punën vjetore të KPK-së.
Maloku komenton rastin e Pantiqit: Është shqetësuese çfarëdo ndërhyrje nga pushteti
Kryesuesi i Këshillit Prokurorial të Kosovë (KPK), Jetish Maloku ka komentuar lirimin në arrest shtëpiak të ish-policit, Dejan Pantiq.
Ai u pyet se si e sheh që Pantiq nuk u arrit të transferohej në Prishtinë, pas kërkesës së prokurorit të rastit. Sipas tij, për këtë çështje nuk është përgjegjëse Prokuroria.
Ai tha se është shqetësuese çfarëdo ndërhyrje nga pushteti në sistemi e drejtësisë.
Duke iu kundërpërgjigj Qeverisë dhe përfaqësuesve të Lëvizjes Vetëvendosje, të cilët iu drejtuan Këshillit Prokurorial dhe atij Gjyqësor, duke fajësuar për ndryshimin e masës ndaj Panqitit.
“Në aspektin e mos-arritjes së të dyshuarit, nuk mendojmë se është përgjegjës Prokuroria. Janë institucionet përkatëse që duhet ta sigurojnë personin në fjalë. Duhet t’i pyetni të tjerët. Sa i përket reagimeve, ju e keni pranuar reagimin tonë. Aty kemi shprehur shqetësimin dhe çfarëdo ndërhyrje nga pushteti apo nga përfaqësuesit e pushtetit, qoftë në KPK apo KGJK. S’do t’i shtoja asgjë tjetër atij reagimi. Ka qenë dhe është shqetësim çfarëdo ndërhyrje që del nga goja e pushtetit”, tha Maloku, sipas EO.
Maloku: Ulja e pagave e mosdekretimi i Kryeprokurorit, sfidat e KPK-së në 2022-ën
Kryesuesi i Këshillit Prokurorial të Kosovës (KPK), Jetish Maloku, ka thënë se gjatë vitit 2022, kanë pasur sukses në zgjidhjen e rasteve të korrupsionit dhe krimit ekonomik, raporton Ekonomia Online.
Në konferencën e fundit për këtë vit, Maloku tha se gjatë këtij viti si institucion janë përballur me shumë sfida.
Një ndër sfidat kryesore ishin mosdekretimi i Kryeprokurorit të shtetit nga ana e Presidentes, buxheti i pamjaftueshëm dhe ulja e pagave për prokurorët.
“Mosplotësimi i këshillit me dy anëtarë, buxheti i pamjaftueshëm, vonesa në dekretimin e kryeprokurorit, vendimi i qeverisë për ulje të pagave. Ngritja e kapaciteteve profesionale të stafit”, tha ai.
“Me përkrahjen e partnerëve ka hartuar planin strategjik. Ky plan paraqet hartimin e menaxhimin e KPK për tre vitet e ardhshme. Gjatë periudhës raportuese raportuese, Këshilli ka punuar në përzgjedhjen e kryeprokurorit të shtetit, me të cilin ka dërguar për dekretim një propozim. Lidhur me këtë proces, janë kryer edhe intervistime dhe procesi ka qenë transparent”.
“Një nga objektivat e Këshillit ka qenë transparenca dhe llogaridhënia, ku kemi pranuar dhjetë kërkesa për llogaridhënie”, tha tutje ai.
“Sistemi prokurorial kemi arritur që nga 380 raste të korrupsionit t’i zgjedhim 280 raste. 224 raste janë zgjedhur në rastet e krimeve ekonomike. Këshilli ka pranuar edh raportin e auditorit, ku nuk ka pasur asnjë vërejtje në këtë raport”, tha Maloku.
