Lushaku-Sadriu: Nëse udhëheqim Arsimin, më 1 shtator secilit nxënës do t’i sigurohen librat

Kandidatja për deputete nga Lidhja Demokratike e Kosovës, Jehona Lushaku-Sadriu, ka garantuar që nëse arsimi në qeverinë e ardhshme udhëhiqet nga kjo parti, nxënësve do t’iu sigurohen librat më 1 shtator. Lushaku-Sadriu tha se shpërndarja e librave te nxënësit nga qeveria, ashtu siç është bërë deri para dy viteve, kushton më pak edhe është më e lehtë për prindërit. “Blerja e librave është kritikuar është kritikuar nga unë për dy vite radhazi. Garantoj që nëse arsimi do të udhëhiqet nga ne, secilit nxënës do t’i sigurohen librat më 1 shtator sepse kushton më pak dhe është më e lehtë për prindërit”, tha ajo në Rubikon në Klan Kosova. Më tej, ajo premtoi se që në javën e parë të qeverisë, nëse ajo udhëhiqet nga LDK-ja, do të ketë rritje të koeficientit në 150 për mësimdhënësit. “Që në javën e parë ta rrisim koeficientin në 150, që i bie mesatarisht 200 euro për secilin mësimdhënës dhe kjo do të krijojë edhe me matjen e performancës dhe lidhjen me trajnimet, besoj që mirëqenia e tyre do të rritet”, tha ajo. https://www.youtube.com/watch?v=tLOh3Hz7EZ0