Luftimet rifillojnë në Ukrainë pas përfundimit të “armëpushimit të Pashkëve”: Rusia sulmon me dronë disa rajone 

Vetëm disa orë pas përfundimit të armëpushimit 30-orësh të shpallur nga Moska me rastin e Pashkëve, Ukraina raportoi sulme të shumta me dronë nga Rusia në disa rajone të vendit. Forcat ajrore ukrainase aktivizuan alarmin e sulmeve ajrore në rajonin e Kievit, si dhe në Kherson, Dnipropetrovsk, Cherkasy, Mykolaiv dhe Zaporizhzhia. Në qytetin jugor të Mykolaiv, kryetari Oleksandr Senkevych tha se janë dëgjuar shpërthime, megjithëse ende nuk ka të dhëna për viktima. Zyrtarët lokalë në rajonin e Kievit njoftuan se mbrojtja ajrore ishte aktive dhe po ndërhynte ndaj objektivave ajrore. Sulme me raketa u raportuan gjithashtu në qendër të vendit. Armëpushimi i shpallur nga presidenti rus Vladimir Putin përfundoi të dielën në mesnatë sipas orës së Moskës, dhe që të dyja palët akuzuan njëra-tjetrën për shkelje të tij. Presidenti ukrainas Volodymyr Zelensky deklaroi se gjatë kësaj periudhe janë regjistruar 1,882 raste të granatimeve ruse, nga të cilat 812 përfshinin armë të rënda. Sulmet më të rënda ishin përqendruar në qytetin e rrethuar të Pokrovsk, një nyje logjistike kyçe në rajonin e Donetskut, raporton BBC, transmeton Klankosova.tv. Zelensky e cilësoi armëpushimin e Putinit si një “trik PR” dhe deklaroi se “fjalët e tij ishin bosh”. Ndërkohë, Ministria e Mbrojtjes ruse këmbënguli se trupat e saj e kanë respektuar me përpikëri armëpushimin. Rusia akuzoi Ukrainën për përdorimin e raketave të furnizuara nga SHBA gjatë pauzës së luftimeve. Ish-presidenti amerikan Donald Trump tha se “shpreson që Rusia dhe Ukraina do të arrijnë një marrëveshje këtë javë”, por nuk dha detaje. Ndërkohë, një zëdhënës i Departamentit të Shtetit konfirmoi se SHBA mbetet e përkushtuar ndaj një armëpushimi të plotë dhe gjithëpërfshirës. Lufta në Ukrainë ka hyrë në vitin e tretë, me Rusinë që aktualisht kontrollon rreth 20% të territorit ukrainas. Numri i të vrarëve dhe të plagosurve nga të dyja palët llogaritet në qindra mijëra.