“Love Me Tender” sonte në Kino Armata

Çmimi Lux i Audiencës, më i madhi i filmit të zgjedhur nga audienca në Evropë, po vazhdon në Kino Armata, Prishtinë. Një ndër pesë filmat e nominuar, “Love Me Tender” nga regjisorja Anna Cazenave Cambet do të shfaqet sonte duke filluar prej orës 19:00. Kjo vepër bën fjalë për Clémence, një avokate, e cila largohet nga martesa e saj për të përqafuar veten e saj të vërtetë. Ish-burri i saj lufton për kujdestarinë e djalit të tyre Paul, duke e manipuluar atë. Ndërsa marrëdhënia e tyre përkeqësohet, Clémence lufton për të ruajtur lidhjen e saj amërore. Regjisorja Anna Cazenave Cambet është regjisore franceze e njohur për stilin intim dhe emocionalisht të thellë në kinemanë bashkëkohore franceze. U bë e njohur fillimisht me filmin e shkurtër “Gabber Lover” (2016), i cili u përzgjodh në Festivalin e Filmit në Kanë, ndërsa në vitin 2025, ajo prezantoi filmin e saj të dytë të gjatë, “Love Me Tender”, në seksionin Un Certain Regard në Kanë./Klankosova.tv