Lajmet e fundit
23:01 - Dyshohet për sulm me shok-bombë ndaj një njësiti të EULEX-it në veri
Një njësit i EULEX-it po dyshohet se është sulmuar pak minuta me parë në pjesën veriore të vendit.
Sipas burimeve të Klan Kosovës, sulmi dyshohet të ketë ndodhur në Rudarë të Komunës së Zveçanit.
Deri më tani nuk ka ndonjë konfirmim as nga EULEX-i e as nga Policia e Kosovës.
Nuk dihet për dëmet e këtij sulmi. /Klankosova.tv
Foto: Ilustrim (vetura e EULEX-it nga sulmi i mëhershëm në KKZ-në e Mitrovicës së Veriut)
21:55 - Në barrikadat e serbëve bllokohen dy kamionë, një nga Peja e tjetri nga Prizreni
Serbët që kanë vënë barrikada në pjesën veriore të vendit, kanë bllokuar edhe dy kamionë – njëri nga Peja e tjetri nga Prizreni.
Gazetarja e Klan Kosovës, Qendresa Tërshani, njofton se shoferët e tyre janë lejuar të largohen këmbë, mirëpo nuk i kanë lejuar ata që t’i zhvendosin edhe kamionët e tyre.
20:34 - Shkëmbim zjarri në mes grupeve kriminale në veri dhe policisë
Serbët që kanë vënë barrikada në disa rrugë në veri të Kosovës, kanë shtënë me armë në drejtim të zyrtarëve policorë.
Njësitet policore, në vetëmbrojtje, thuhet se janë detyruar t’iu kundërpërgjigjen me armë zjarri të dyshuarve, të cilët janë zmbrapsur dhe larguar në drejtim të panjohur.
Sipas policisë, në rrugën që shpie në pikëkalimin kufitar në Bërnjak, grupet kriminale serbe kanë shtënë me armë në tri raste.
"Persona nga grupe të caktuara kriminale të cilat kanë kryer bllokimin e disa rrugëve në veri të vendit, nga lokacione të ndryshme, në tri raste kanë shtënë me armë zjarri në drejtim të njësiteve policore, të cilat kanë qenë në detyrë zyrtare në afërsi të pendës së liqenit të Ujmanit, në rrugën që shpie në drejtim të pikës kufitare të Bërnjakut", thuhet në njoftimin e policisë.
Po ashtu, bazuar në informacionet e siguruara nga njësitet policore në terren, në disa lokacione të ndryshme, janë dëgjuar po ashtu të shtëna me armë zjarri.
"Deri më tani nuk ka ndonjë informacion zyrtar për ndonjë person të lënduar apo dëme të mundshme të shkaktuara", tha Policia në njoftim. /Klankosova.tv
21:27 - Hidhen mjete piroteknike në Lagjen e Boshnjakëve (FOTO/VIDEO)
Situata në veriun e vendit vazhdon të jetë e tensionuar.
Gazetarja e Klan Kosovës që gjendet atje, Qendresa Tërshani, ka raportuar se në Lagjen e Boshnjakëve janë hedhur mjete piroteknike.
Policia tashmë është në vend të ngjarjes dhe po e heton rastin, raporton Klankosova.tv.
Banorët e kësaj pjese janë duke qëndruar jashtë, të shqetësuar nga situata e cila po mbretëron, sidomos gjatë ditës së sotme.
Kujtojmë se sot, policia e Kosovës arrestoi Dejan Pantiqin, ish-zyrtarin policor, ish-pjesëtar i MUP-it të Serbisë, i cili ishte integruar më parë në Policinë e Kosovës.
Ministri i Brendshëm, Xhelal Sveçla, tha se i ndaluari “sipas dëshmive të Policisë së Kosovës ka organizuar sulmin terrorist në zyrat e KKZ-së në veri të vendit me ç’rast ishin sulmuar zyrtarët e KQZ-së dhe zyrtarët policorë”.
“Pantiqi akuzohet për kryerjen e veprave terroriste dhe sulm kundër rendit kushtetues”, ka shkruar Sveçla në Facebook.
Pas këtij arrestimi, serbët e atjeshëm vendosën barrikada nëpër rrugë, duke bllokuar kështu qasjen për në pikat kufitare, Jarinjë e Bërnjak.
Për pasojë, Policia njoftoi se të dy këto pika kufitare janë mbyllur deri në një vendim tjetër. /Klankosova.tv
