15:34 - Izraeli sulmoi 150 objektiva në Iran gjatë natës
Izraeli përdori qindra municione për të goditur 150 objektiva në Iran gjatë natës, tha të shtunën një zyrtar i Forcave të Mbrojtjes së Izraelit (IDF), duke pretenduar se sulmet izraelite kanë penguar programin bërthamor iranian.
Ushtria izraelite nisi një operacion kundër krerëve të lartë të Iranit, lokacioneve ushtarake dhe shkencëtarëve bërthamorë të premten, në një nga përshkallëzimet më të mëdha ushtarake në Lindjen e Mesme gjatë dekadave të fundit. Irani tha se dhjetëra persona u vranë në sulm, shkruan CNN, transmeton Klankosova.tv.
Teherani u përgjigj duke qëlluar me breshëri raketash balistike drejt Izraelit, ku vrau tre persona dhe plagosi dhjetëra të tjerë, tha zyrtari i IDF-së në një konferencë për media.
Zyrtari tha se sulmet në lokacionet bërthamore të Iranit në Natanz dhe Isfahan ishin në gjendje të dëmtonin lokacionet "ndjeshëm". Irani më parë tha se dëmi në objekte ishte i kufizuar.
14:52 - Irani i pavendosur për rifillimin e bisedimeve bërthamore me SHBA-në
Irani thotë se është ende i pavendosur nëse do të marrë pjesë në negociatat bërthamore me SHBA-në në Oman të dielën, për shkak të sulmeve të Izraelit.
Teherani thotë se sulmet izraelite u kryen me miratimin e Uashingtonit dhe për këtë arsye i bëjnë negociatat me SHBA-në "të pakuptimta", shkruan BBC, transmeton Klankosova.tv.
Zëdhënësi i ministrisë së Jashtme, Esmail Baqai, i tha televizionit shtetëror të shtunën se një vendim përfundimtar në lidhje me pjesëmarrjen në raundin e gjashtë të planifikuar të bisedimeve mbi programin bërthamor të Iranit mbetet i paqartë.
Të premten, Baqai deklaroi se nuk kishte "kuptim" të vazhdonin bisedimet pas sulmeve izraelite, të cilat vranë shumë zyrtarë të lartë ushtarakë dhe shkencëtarë bërthamorë.
13:28 - “Sy për sy” – banorët e Teheranit të zemëruar pas sulmeve vdekjeprurëse izraelite
Banorët e Teheranit kanë shprehur zemërim dhe indinjatë pasi Izraeli nisi sulme vdekjeprurëse në kryeqytetin iranian të premten.
“Izraeli vrau komandantët tanë dhe çfarë presin në këmbim? Një puthje?” tha Mahmoud Dorri, një shofer taksie 29-vjeçar për Associated Press. “Ne do t’i ndjekim për t’i ndëshkuar: sy për sy”, transmeton Klankosova.tv.
Një tjetër banore, një mësuese 31-vjeçare, shprehu mbështetjen e saj për vendin e saj për kundërshtimin e qeverisë izraelite, veçanërisht pas sulmit të zgjatur në Gaza.
“Dikush duhet t’i ndalë izraelitët. Ata mendojnë se mund të bëjnë çfarë të duan në çdo kohë”, tha Pari Pourghazi për AP. “Irani tregoi se izraelitët gabojnë, megjithëse mund të shtypin njerëzit e Gazës ose Libanit me bombardime të rënda”.
Të tjerë bënë thirrje për përmbajtje pas sulmeve izraelite. “Unë e mbështes vendin tim. Izraelitët bënë një gabim duke nisur sulmet ndaj Iranit, por shpresoj që kjo të marrë fund”, tha mekaniku 61-vjeçar i automjeteve Houshang Ebadi. “Lufta nuk do të japë fryte për asnjërën palë”.
12:51 - Izraeli vrau nëntë ekspertë bërthamorë të Iranit
Izraeli vrau shkencëtarë dhe ekspertë të përfshirë në programin bërthamor të Iranit gjatë sulmeve, tha ushtria e tij të shtunën, duke e rritur numrin e të vrarëve nga gjashtë në nëntë.
Forcat Mbrojtëse të Izraelit (IDF) thanë se Ali Bakhouei Karimi, Mansour Asgari dhe Saeed Barji - ekspertë përkatësisht në mekanikë, fizikë dhe inxhinierë materialesh - u vranë nga sulmet të premten, shkruan BBC, transmeton Klankosova.tv.
Vdekjet e tyre u konfirmuan nga agjencia gjysmëzyrtare e lajmeve Tasnim e Iranit.
Izraeli kishte thënë më parë se kishte vrarë gjashtë ekspertë të përfshirë në programin bërthamor, së bashku me tre udhëheqës kryesorë ushtarakë.
12:24 - Irani paralajmëron hakmarrje nëse ShBA, Franca dhe Mbretëria e Bashkuar ndihmojnë Izraelin
Media shtetërore iraniane ka raportuar se Irani ka lëshuar një paralajmërim për Shtetet e Bashkuara të Bashkuara, Mbretërinë e Bashkuar dhe Francën që të mos e ndihmojnë Izraelin të ndalojë sulmet hakmarrëse të Teheranit.
Media shtetërore thotë se Teherani do të shënjestrojë bazat ushtarake dhe anijet e vendosura në rajon nëse të tre vendet i ofrojnë mbështetje Izraelit.
Ky paralajmërim vjen pas një sërë sulmesh ndërmjet Izraelit dhe Iranit, që nisën qysh nga orët e hershme të së premtes, shkruan BBC, transmeton Klankosova.tv.
12:13 - Foshnja tre-muajshe nxirret e gjallë nga rrënojat pas sulmit iranian në Izrael
Një foshnjë tre-muajshe ishte midis atyre që u shpëtuan nga rrënojat pasi sulmet hakmarrëse të raketave iraniane goditën shtëpitë në Izraelin qendror.
Të paktën tre persona u vranë dhe 20 u plagosën kur Rishon LeZion, një periferi e Tel-Avivit, u godit nga një breshëri raketash herët në mëngjes, raporton “Telegraph”, transmeton Klankosova.tv.
Një oficer policie u pa duke e mbajtur foshnjën, e cila shërbimet e emergjencës thanë se ishte plagosur lehtë.
“E tërhoqa në krahët e mi dhe pastaj ia dhashë oficerit të parë të policisë që pashë, dhe pastaj fillova të nxirrja të gjithë anëtarët e tjerë të familjes”, tha Idan Chen, kapiteni i shërbimit të zjarrfikësve dhe shpëtimit.
“Ndërsa po e bënim këtë, kishte njerëz të bllokuar në shtëpinë sipër dhe pranë – dhe përballë kishte një zjarr”, i tha ai agjencisë izraelite të lajmeve “Walla”.
12:02 - Ministri izraelit i Mbrojtjes: Teherani do të digjet nëse sulmet vazhdojnë
Ministri izraelit i Mbrojtjes, Israel Katz, tha të shtunën se njerëzit në Teheran do të paguajnë rëndë nëse Irani vazhdon me sulmet e tij me raketa, duke paralajmëruar se kryeqyteti iranian do të digjet.
“Diktatori iranian po i kthen qytetarët e Iranit në pengje dhe po krijon një realitet në të cilin ata - veçanërisht banorët e Teheranit - do të paguajnë një çmim të rëndë për sulmet kriminale ndaj civilëve izraelitë”, tha Katz pasi zhvilloi një takim mbi situatën me udhëheqësit e ushtrisë izraelite, shkruan CNN, transmeton Klankosova.tv.
“Nëse Khamenei vazhdon të qëllojë me raketa në frontin e brendshëm izraelit, Teherani do të digjet”, shtoi Katz.
11:20 - Izraeli do të rifillojë sulmet ajrore ndaj Teheranit
Ushtria izraelite është gati të rifillojë sulmet ndaj objektivave në kryeqytetin e Iranit, Teheran, tha të shtunën kreu i Forcave të Mbrojtjes së Izraelit (IDF).
"IDF po vepron sipas planeve të saj operacionale dhe avionët luftarakë të IAF (Forcave Ajrore të Izraelit) janë gati të rifillojnë sulmet ndaj objektivave në Teheran", thanë të shtunën Shefi i Shtabit të Përgjithshëm të IDF-së, Eyal Zamir, dhe Shefi i Forcave Ajrore, Tomer Bar, shkruan BBC, transmeton Klankosova.tv.
Si Izraeli ashtu dhe Irani shkëmbyen zjarre gjatë natës. Raportohet se 60 persona janë vrarë pas një sulmi izraelit ndaj një ndërtese banimi në Teheran, mes tyre 20 fëmijë, përfshirë një foshnje vetëm 6 muajshe.
11:02 - Sulmi izraelit në Tehran vret 60 persona, përfshirë 20 fëmijë dhe një foshnje 6 muajshe
Sipas një gazetari të medias shterërore iraniane, gjashtëdhjetë persona janë vrarë pas një sulmi izraelit ndaj një ndërtese banimi në Teheran.
Siç raporton CNN, transmeton Klankosova.tv, 20 fëmijë u vranë në ndërtesën e banimit, përfshirë një foshnje vetëm 6 muajshe. Ndërkaq, dhjetë trupa thuhet se mbeten nën rrënoja.
Televizioni iranian transmetoi pamje direkte të punëtorëve që po hiqnin mbeturinat nga vendi i ndërtimit të një ndërtese 14-katëshe në kompleksin rezidencial Shahrak-e Shahid Chamran në Teheran.
I dërguari i Iranit në OKB, Amir Saeid Iravani, tha të premten se të paktën 78 persona ishin vrarë nga sulmet izraelite. Nuk ishte menjëherë e qartë nëse 60 të vrarët në ndërtesën e banimit ishin përfshirë në numrin e tij.
10:19 - Izraeli thotë se goditi dhjetëra objektiva në Teheran
Ushtria izraelite ka deklaruar se forcat ajrore të vendit goditën "dhjetëra" objektiva në Teheran gjatë natës, duke përfshirë infrastrukturën e raketave tokë-ajër.
Gjeneral Major Tomer Bar thotë në një deklaratë se sulmet kishin "rëndësi operacionale dhe kombëtare", shkruan BBC, transmeton Klankosova.tv.
“Vendet strategjike u dëmtuan”, shtoi ai.
09:37 - Irani rrëzon dronët izraelitë në kufirin e Salmasit
Irani tha se kishte rrëzuar dronë izraelitë që kaluan kufirin e tij veriperëndimor pranë Salmasit, raportoi të shtunën televizioni i shtetit, Nour News.
“Luftëtarët islamikë ia dolën të rrëzojnë dronët izraelitë që kanë kaluar kufirin tonë”, thuhet në raportim, shkruan CNN, transmeton Klankosova.tv.
Dronët kanë qenë një element kyç i sulmit të Izraelit ndaj Iranit, të cilin e nisi në orët e para të mëngjesit të së premtes. Zyrtarët izraelitë të sigurisë thanë se përpara sulmit, Izraeli kishte krijuar një bazë për lëshimin e dronëve shpërthyes brenda Iranit dhe dronët u përdorën më vonë për të synuar lëshuesit e raketave pranë Teheranit.
09:10 - Vazhdojnë kërkimet për të bllokuarit nën rrënoja pas sulmit iranian në Izrael
Këtë të shtunë, që nga orët e hershme të mëngjesit po vijojnë kërkimet për banorët e bllokuar nën rrënoja, pas asaj që policia e quajti një sulm vdekjeprurës me raketa iraniane që goditi pranë një zone banimi të Rishon Lezion në jug të Tel Avivit.
Në një imazh të ndarë nga policia izraelite, policja Aviv Sarga është fotografuar duke mbajtur një foshnjë nga zona e impaktit, ku shërbimet e emergjencës konfirmuan se dy persona u vranë dhe 19 u plagosën, shkruan CNN, transmeton Klankosova.tv.
Agjencia kombëtare e reagimit ndaj emergjencave Magen David Adom (MDA) tha se punonjësit e saj “hasën në shkatërrimet e disa ndërtesave” kur mbërritën në vendngjarje.
“Disa nga të plagosurit ishin bllokuar nën rrënoja; të tjerë ishin të plagosur në këmbë”, thanë zyrtarët e MDA në një deklaratë. “Kjo ishte një skenë e vështirë dhe komplekse, dhe ne po vazhdojmë kërkimin për t’u siguruar që askush të mos mbetet i bllokuar.”
08:48 - Irani dhe Izraeli shkëmbyen zjarr gjatë natës, ja çfarë po ndodh atje
Irani ka nisur një valë sulmesh hakmarrëse në përgjigje të sulmeve të Izraelit ndaj objekteve të tij bërthamore dhe raketore.
Dy persona kanë vdekur në këto sulme, sipas shërbimeve izraelite të emergjencës. Forca Mbrojtëse Izraelite (IDF) thotë se po vazhdon të sulmojë Iranin, shkruan BBC, transmeton Klankosova.tv.
Ja çfarë tjetër duhet të dini:
-Dhjetëra njerëz janë plagosur, thotë shërbimi i emergjencës së Izraelit, pas sulmeve me raketa në rajonin qendror të Rrafshit Bregdetar.
-Korrespondentët e BBC-së kanë raportuar se kanë dëgjuar shpërthime në Izraelin qendror gjatë natës, ndërsa miliona njerëz kërkuan strehim ndërsa sirenat binin.
-Izraeli po vazhdon sulmet ajrore ndaj Iranit, pasi një valë fillestare sulmesh vrau gjashtë shkencëtarë bërthamorë dhe komandantë të lartë iranianë.
-Përfaqësuesi i Iranit në OKB thotë se numri i të vdekurve iranianë nga sulmet e fundit izraelite ishte 78, me më shumë se 320 të plagosur – ai shton se “shumica dërrmuese” janë civilë.
7:21 – Pasojat e sulmeve hakmarrëse me raketa të Iranit në Tel Aviv (FOTO)
Forcat iraniane lëshuan disa valë raketash drejt Izraelit gjatë natës.
Trupat e Gardës Revolucionare Islamike të Iranit thanë se shënjestruan qendrat ushtarake dhe bazat ajrore izraelite, shkruan CNN, transmeton Klankosova.tv
Ushtria izraelite pretendoi se ka ndërhyrë në disa nga valët e fundit të raketave iraniane, por ka raportime për njerëz të bllokuar nën rrënojat e ndërtesave.
Derisa, sulmet hakmarrëse të Iranit kanë vrarë të paktën dy persona, thanë autoritetet izraelite. Një person u vra dhe më shumë se 20 u plagosën pasi një raketë iraniane goditi pranë shtëpive në Rishon Lezion, pak në jug të Tel Avivit.
Kurse, në Iran, të paktën 78 persona u vranë në sulmet izraelite, përfshirë zyrtarë të lartë ushtarakë, tha të premten i dërguari i Iranit në OKB, Amir Saeid Iravani. Më shumë se 320 persona u plagosën, shumica prej tyre civilë. /Klankosova.tv
Ekipet izraelite të shpëtimit në vendin ku një raketë balistike iraniane goditi disa ndërtesa banimi7:00 – Valë e re raketash iraniane teksa agon mëngjesi në Tel Aviv
Kanë kaluar pak më shumë se 24 orë që kur Izraeli nisi një sulm masiv me dy drejtime kundër Iranit, që synonte shkatërrimin e centraleve bërthamore të vendit dhe rrëzimin e udhëheqjes së tij ushtarake në Teheran.
Irani, i cili u zotua për një “përgjigje shkatërruese” ndaj sulmit, nisi disa valë sulmesh vdekjeprurëse kundër vendeve në të gjithë Izraelin gjatë natës deri të shtunën, me të dyja palët që raportuan vdekje dhe plagosje të shumta.
Sirenat u dëgjuan në Izrael deri të shtunën në mëngjes dhe shpërthime u raportuan në Tel Aviv, Jerusalem dhe Teheran, ndërsa përshkallëzimi i konfliktit rrezikon ta fusë Lindjen e Mesme në një luftë më të gjerë. /Klankosova.tv
06:58 – Izraeli vazhdon sulmet ndaj Iranit
Forcat Mbrojtëse të Izraelit (IDF) njoftojnë se po vazhdojnë sulmet ajrore ndaj objektivave në Iran.
Në një deklaratë të shkurtër të postuar në Telegram, IDF shkroi se “Forcat Ajrore Izraelite vazhdojnë të godasin objektiva në Iran”.
Komentet u postuan së bashku me një video që tregonte pamje nga sulmet ajrore.
Kjo vjen më shumë se 24 orë pas sulmit fillestar të Izraelit në bazat ushtarake të Iranit, i cili vrau tre komandantë ushtarakë iranianë, sipas IDF, shkruan BBC, transmeton Klankosova.tv
Që atëherë, Irani ka nisur sulme me raketa ndaj Izraelit deri të shtunën në mëngjes. /Klankosova.tv
●●●
Shpërndaje këtë artikull
A
SHKRIMI NGA
A
Editorial nga Klan Kosova — ndjek lajme dhe zhvillimet e tjera kryesore të vendit.
