LIVE| Namazi i Fitër Bajramit falet në xhaminë “Haxhi Ibrahim Devolli” në Pejë

Me përfundimin e muajit të shenjtë të Ramazanit, sot kremtohet festa e Fitër Bajramit. Klan Kosova vazhdon traditën e përcjelljes së atmosferës festive në shtëpitë e shikuesve, duke transmetuar drejtpërdrejt ceremoninë e faljes së Bajramit nga Xhamia “Haxhi Ibrahim Devolli” në Pejë. https://www.youtube.com/watch?v=klpvgUmDTms

07:16 - Mesazhi i Fitër Bajramit nga imami Kushtrim Kelmendi Imami i xhamisë “Haxhi Ibrahim Devolli” në Pejë, Kushtrim Kelmendi u ka uruar të gjithë besimtarëve mylimanë festën e Fitër Bajramit. Në një intervistë për emisionin “Ora Shtatë”, Kelmendi tha se shumë qytetarë mezi presin të bëhen pjesë e manifestimit të kësaj feste në xhaminë “Haxhi Ibrahim Devolli”, transmeton Klankosova.tv. Imami Kelmendi po ashtu tha se muaji i shenjtë i Ramazanit pati shumë agjërues, duke theksuar se numri i agjërueseve u varjet nëpër të gjitha xhamitë. Ai pati edhe një mesazh për kremtën e festës së Fitër Bajramit.

06:49 - Fitër Bajrami festohet edhe nga Xhamia e Madhe në Prishtinë Falja e namazit të Fitër Bajramit është mbajtur në orët e hershme të mëngjesit edhe në Xhamia e Madhe e Prishtinës. Oborri dhe hapësirat përreth xhamisë u mbushën me besimtarë të të gjitha moshave, të cilët me përkushtim morën pjesë në faljen e namazit të Bajramit, transmeton Klankosova.tv. Gjatë Hytbes së Bajramit, Myftiu Naim Tërnava përcolli mesazhe për rëndësinë e ruajtjes së vlerave të Ramazanit, duke theksuar solidaritetin, ndihmën ndaj atyre në nevojë dhe forcimin e lidhjeve familjare e shoqërore. Ai u bëri thirrje besimtarëve që të vazhdojnë rrugën e mirësisë dhe përkushtimit edhe pas përfundimit të muajit të agjërimit.

06:45 - Klan Kosova uron festën e Fitër Bajramit Portali Klankosova.tv ua uron festën e Fitër Bajramit të gjithë besimtarëve myslimanë. Fitër Bajrami, që shënon përfundimin e muajit të shenjtë të Ramazanit, është një moment i veçantë reflektimi, falënderimi dhe bashkimi për familjet dhe komunitetin. Klankosova.tv shpreh urimet më të sinqerta për të gjithë besimtarët myslimanë, duke ju dëshiruar shëndet të mirë, paqe në zemrat tuaja, harmoni në familje dhe begati në jetën tuaj. Urojmë që kjo festë të sjellë më shumë dashuri, mirëkuptim dhe shpresë për një të ardhme më të mirë për të gjithë. Gëzuar Fitër Bajramin!

06:39 - Namazi i Fitër Bajramit falet në xhaminë “Haxhi Ibrahim Devolli” në Pejë Namazi i Fitër Bajramit është falur në xhaminë “Haxhi Ibrahim Devolli” në Pejë, ku një numër i madh besimtarësh myslimanë janë mbledhur që në orët e hershme të mëngjesit për të kremtuar një nga festat më të rëndësishme të fesë islame. Besimtarët, të rinj e të moshuar, morën pjesë në faljen e namazit të Bajramit, transmeton Klankosova.tv. Hoxhë, Almedin Ejupi lexoi Kuranin para besimtarëve myslimanë, derisa theksoi edhe rëndësinë e muajit të shenjtë të Ramazanit. Pas faljes, qytetarët u përshëndetën mes vete me urimet tradicionale për Fitër Bajramin, duke ndarë momente gëzimi dhe afërsie. Gëzuar Fitër Bajramin!

06:06 - Hoxhë Mazllami: Allahu të falënderohet e të madhërohet pa ia nda, ditë e natë Hoxhë Enes Mazllami, ka mbajtur ligjëratë kushtuar festës së Fitër Bajramit në xhaminë “Haxhi Ibrahim Devolli në Pejë”. “Allahu dëshiron që ju t’i plotësoni ditët e agjërimit, ta madhëroni atë për udhëzimin që ua ka dhënë dhe të bëheni falënderues ndaj mirësive të tij. Allahu meriton të falënderohet pa ia nda, ditë e natë, e çdo çast. Këto ditë që i kaluam janë begati dhe mirësi e Allahut, të cilat na i mundësoi neve që t’i arrijmë deri në fund”, tha hoxhë Mazllami. “Allahu të falënderohet dhe të madhërohet, për zbritjen e Kuranit. Allahu na i dërgoi pejgamberin tonë, pishtar për të gjithë njerëzimin. Allahu e zbriti Kuranin bashkë me të, udhëzues për mbarë njerëzimin. Kush e ndjek Kuranin, kush i ndjek udhëzimet hyjnore në Kuran, do të shpëtojë në këtë botë”, tha ai nga xhamia “Haxhi Ibrahim Devolli” në Pejë. “Të nderuar besimtarë, Allahu falënderohet me gjuhë, duke e përmendur dhe duke i qenë falënderues ndaj mirësive, e sidomos në këto ditë të mëdha. Myslimanët e madhërojnë Allahun për një gëzim të madh, e ai është gëzimi që kanë arritur ta përfundojnë këtë ibadet të madh”, shtoi ai. /klankosova.tv

05:56 - Kryeimami nga Xhamia e Madhe në Prishtinë: Islami është rend hyjnor e disiplinim i shpirtit Në Xhaminë e Madhe në Prishtinë, kryeimami i KBI-së në Ferizaj, Ibrahim ef. Beqiri, ka mbajtur ligjeratë tematike kushtuar festës së Fitër Bajramit. Para besimtarëve myslimanë, kryemami tha se islami është rend hyjnor, sistem jete, formësim i ndërgjegjes e disiplinim i shpirtit, transmeton Klankosova.tv. “Nuk ka Zot tjetër përpos Allahut”, u shpreh ai.

05:46 - Interpretohen ilahi në gjuhën shqipe në xhaminë “Haxhi Ibrahim Devolli” në Pejë Ilahisti Egzon Ibrahimi, së bashku me grupin e tij interpretuan ilahi në gjuhën shqipe në xhaminë “Haxhi Ibrahim Devolli” në Pejë. Interpretimi i këtyre ilahive ngjalli emocione të forta te besimtarët myslimanë që janë pjesëmarrës për faljen e namazit të sabahut dhe namazit të Fitër Bajramit, transmeton Klankosova.tv. Ndërkohë, Klan Kosova vazhdon traditën e përcjelljes së atmosferës festive në shtëpitë e shikuesve, duke transmetuar drejtpërdrejt ceremoninë e faljes së Bajramit nga Xhamia “Haxhi Ibrahim Devolli” në Pejë.

05:34 - U përgatitën gjatë muajit të Ramazanit, Egzon Ibrahimi vjen me ilahi të reja Ilahisti, Egzon Ibrahimi bashkë me grupin e tij kanë interpretuar ilahi të reja, të cilat u përgatitën gjatë muajit të shenjtë të Ramazanit, transmeton Klankosova.tv. Kështu ka bërë të ditur vet ai, i cili tha se: “I kemi disa ilahi të reja që i kemi bërë së fundmi në muajin e Ramazanit. Ilahitë do të jenë diçka shpirtërore”. E si çdo herë tjetër, televizioni Klan Kosova vjen me transmetim special nga xhamia “Haxhi Ibrahim Devolli” në Pejë.

05:20 - Egzon Ibrahimi vjen me ilahi nga xhamia “Haxhi Ibrahim Devolli” Besimtarët myslimanë po falin namazin e sabahut nga xhamia “Haxhi Ibrahim Devolli” në Pejë. Para tyre, me rastin e festës së Fitër Bajramit, erdhi me ilahi, ilahisti Egzon Ibrahimi, transmeton Klankosova.tv. Kujtojmë se namazi i Fitër Bajramit do të falet në ora 06:18, ndërsa Klan Kosova vazhdon traditën e përcjelljes së atmosferës festive në shtëpitë e shikuesve, duke transmetuar drejtpërdrejt ceremoninë e faljes së Bajramit nga Xhamia “Haxhi Ibrahim Devolli” në Pejë.

05:10 - Besimtarët falin namazin e sabahut në xhaminë “Haxhi Ibrahim Devolli” në Pejë Besimtarët myslimanë i janë drejtuar Xhamisë së “Haxhi Ibrahim Devollit” në Pejë, për të falur namazin e sabahut. Pas përfundimit të namazit të sabahut, do mbahen ligjërata tematike kushtuar festës së Fitër Bajramit. Namazi i Fitër Bajramit falet në orën 06:18, transmeton Klankosova.tv. Ndërkohë, Klan Kosova do të vazhdojë traditën e përcjelljes së atmosferës festive në shtëpitë e shikuesve, duke transmetuar drejtpërdrejt ceremoninë e faljes së Bajramit nga Xhamia “Haxhi Ibrahim Devolli” në Pejë.

04:50 - Përfundimi i muajit të shenjtë të Ramazanit, sot festa e Fitër Bajramit Sot besimtarët myslimanë festojnë Fitër Bajrami, një nga festat më të rëndësishme në kalendarin islam. Me këtë rast, në orët e hershme të mëngjesit do falet namazi i Fitër Bajramit në të gjitha xhamitë e vendit. Qindra qytetarë mblidhen për të kryer këtë ritual të shenjtë, duke shënuar përfundimin e muajit të shenjtë të Ramazanit, transmeton Klankosova.tv. Atmosfera festive shoqërohet me urime për paqe, shëndet dhe begati, ndërsa besimtarët përcjellin mesazhe solidariteti dhe bashkimi. Fitër Bajrami simbolizon sakrificën, faljen dhe ndihmën ndaj atyre në nevojë, duke përforcuar vlerat e solidaritetit dhe harmonisë në shoqëri.