Lirika Deva, e 27-ta në Lojërat Olimpike për të rinj në Kore të Jugut

Komiteti Olimpik i Kosovës ka njoftuar se skitarja jonë, Lirika Deva, ka realizuar një tjetër paraqitje të mirë në Lojërat Olimpike Dimërore për të Rinj Gangwon 2024, në Kore të Jugut. Skitarja jonë zuri vendin e 27-të nga 79 garuese në disiplinën e sllallomit. Ajo la pas vetes 51 garuese, ku 34 dolën nga shtegu. Lirika mori edhe 118.95 pikë të FIS-it, raporton Klankosova.tv. “Është ky rezultati më i mirë ndonjëherë për Kosovën në Lojërat Olimpike Dimërore për të rinj”, ka thënë KOK-u. Lirika pati kohën 1 minutë e 50.54 sekonda nga të dyja lëshimet. Në lëshimin e dytë ishte më e shpejtë për rreth dy sekonda. Deva garoi edhe të martën në sllallom të madh, ku u rendit e 31-ta. KOK njofton se në konkurrencën e meshkujve, është dashur të paraqitet edhe Klos Vokshi, por shkaku i lëndimit të pësuar në garën e djeshme në sllallom të madh, e kishte të pamundur garimin në sllallomin e sotëm. Me garën e sotme mbyllet edhe përfaqësimi i sportistëve kosovarë në LOD që po mbahen në Gangwon të Koresë së Jugut. /Klankosova.tv