Lidhja e Bizneseve të Kosovës kërkon heqjen e tarifës së SHBA-së për mallrat

Lidhja e Bizneseve të Kosovës ka shprehur shqetësim lidhur me vendimin e administratës amerikane për vendosjen e tarife prej 10 për qind mbi importet nga Kosova. Lidhja e Bizneseve thotë se ky vendim do të ketë ndikim të drejtpërdrejtë në konkurrueshmërinë e produkteve kosovare në tregun amerikan dhe do të ngadalësojë rritjen e eksporteve, duke e bërë më të vështirë për bizneset kosovare të mbeten konkurruese në tregjet e Shteteve të Bashkuara të Amerikës, transmeton Klankosova.tv. LBK ka përpiluar një listë se çfarë ndikimi do të ketë kjo tarifë në ekonominë kosovare:

1. Rritja e kostove të prodhimit dhe eksportit – Me vendosjen e kësaj tarife, bizneset eksportuese do të përballen me rritje të kostove, gjë që do të ndikojë në çmimet finale të produkteve dhe uljen e fitimeve;
2. Rënie e eksporteve drejt SHBA-së – Kosova tashmë ka një përqindje të ulët të eksporteve në SHBA në krahasim me vendet e rajonit. Një tarifë e tillë do ta ulë edhe më shumë këtë shkallë, duke ndikuar në stabilitetin e industrive të përfshira;
3. Humbja e investimeve të huaja – Kosova ka qenë një destinacion në zhvillim për investitorët amerikanë, veçanërisht në sektorët e prodhimit dhe përpunimit. Vendosja e tarifave mund të dekurajojë investimet e reja dhe të rrezikojë zgjerimin e investimeve ekzistuese;
4. Rreziku i zinxhirit të furnizimit dhe humbja e tregjeve – Eksportuesit kosovarë që janë pjesë e zinxhirëve globalë të furnizimit mund të pësojnë goditje nëse produktet e tyre bëhen më pak konkurruese krahasuar me vendet që nuk përballen me këto barriera tarifore.

Nevoja për veprime strategjike Lidhja e Bizneseve të Kosovës u ka bërë thirrje institucioneve vendore që të angazhohen në dialog të drejtpërdrejtë me autoritetet amerikane për të rishikuar këtë vendim dhe për të gjetur alternativa që forcojnë tregtinë mes dy vendeve. "Kosova duhet të vazhdojë të tregojë gatishmëri për bashkëpunim ekonomik dhe të thellojë marrëdhëniet me partnerët amerikanë, duke synuar krijimin e një ambienti më të favorshëm për tregti dhe investime. Lidhja e Bizneseve të Kosovës mbetet e përkushtuar për të mbrojtur interesat e komunitetit të biznesit dhe për të lobuar për politika që nxisin rritjen ekonomike dhe forcimin e pozitës sonë në tregjet ndërkombëtare", thuhet ndër të tjera në reagim.