“Libri im i kujtimeve” nga Rafet Rudi promovohet sot në Bibliotekën Kombëtare

 Në ambientet e Bibliotekës Kombëtare të Kosovës, sot nga ora 18:00, do të promovohet libri “Libri im i kujtimeve” nga kompozitori dhe dirigjenti i njohur Rafet Rudi. Libri paraqet një kronikë të jetës muzikore në Kosovë nga vitet ’70 deri në vitin 1999, përmes kujtimeve personale të autorit dhe shkrimeve të tij që datojnë nga viti 1975. Përmes këtij botimi, Rudi ndan rrëfime mbi zhvillimet artistike në një kontekst të gjerë shoqëror, politik dhe kulturor, duke ofruar informacione të rralla që shpesh mungojnë në burimet zyrtare. Ky libër ka karakteristika biografike, por është më shumë një kronikë e kohës dhe e ndikimeve që kanë formuar autorin. Ai ofron informacione të vlefshme për periudha të rëndësishme të jetës muzikore, të cilat janë të vështira për t’u gjetur në arkiva zyrtarë. Për të diskutuar rreth librit, në panelin diskutues do të marrin pjesë: autori Rafet Rudi, filozofi dhe kritiku Shkëlzen Maliqi, kompozitori dhe studiuesi Nestor Kraja, si dhe ushtruesi i detyrës së drejtorit të Filharmonisë së Kosovës, Dardan Selimaj, transmeton Klankosova.tv.