Leclerc përgëzon Hulkenbergun: E meriton plotësisht këtë podium!

Pas përfundimit të Çmimit të Madh të Britanisë në Silverstone, Charles Leclerc ishte ndër të parët që përgëzoi Nico Hulkenbergun për arritjen e tij të jashtëzakonshme: podiumin e parë në karrierën e tij në Formula 1, pas më shumë se 16 vitesh garë dhe mbi 200 Grand Prix të zhvilluara. ''Jam shumë i lumtur për Nico-n'', tha Lecler, transmeton klankosova.tv. ''Ai është një nga pilotët më të respektuar në paddock dhe e ka merituar këtë moment për një kohë shumë të gjatë. Ishte fantastike ta shihje në podium''. Hulkenberg, piloti i Stake F1 Team Kick Sauber, befasoi të gjithë duke përfunduar garën në vendin e tretë, edhe pse e nisi nga pozita e 19-të në start. Me një strategji brilante dhe një ritëm të jashtëzakonshëm, gjermani arriti të ngjitej në podium për herë të parë në karrierën e tij, duke shkruar histori në Formula 1. Forma e mirë e Sauber ishte sinjalizuar edhe në garën e mëparshme në Austri, ku të dy pilotët e ekipit përfunduan në pikë – një paralajmërim për potencialin që shpërtheu në Silverstone. Reagimet pozitive nga pilotë të tjerë, si Fernando Alonso, George Russell dhe Lando Norris, nuk munguan. Ata e përshkruan podiumin e Hulkenbergut si një moment të veçantë për sportin dhe një shpërblim për durimin dhe përkushtimin e tij. ''Ky është një nga ato momente që e bëjnë Formula 1-n magjike'', u shpreh Alonso. Podiumi i parë për Hulkenbergun nuk është thjesht një statistikë, është një histori frymëzuese për këdo që nuk dorëzohet. Dhe në pistën legjendare të Silverstone, më në fund, Nico Hulkenberg pati ditën e tij.