Lajmet e fundit
Përfaqësuesi Special i Bashkimit Evropian për Ballkanin Perëndimor, Miroslav Lajçak, ka mohuar sot vlerësimin e presidentit serb Alleksandar Vuçiq se Serbia nuk mund të bëhet anëtare e bllokut prej 27 vendeve deri në vitin 2028.
“Letonia, Lituania dhe Sllovakia përfunduan negociatat e tyre të pranimit në më pak se tre vjet. Mali i Zi dhe Serbia kanë negociuar prej vitesh dhe janë ende larg mesit të procesit. Por nëse jeni seriozë, nëse filloni të mbyllni kapituj, mund ta bëni për dy vjet e gjysmë dhe dy të tjera për ratifikim. Nuk është jorealiste, por është një skenar ideal”, tha Lajçaku në konferencën rajonale të sigurisë GLOBSEC në Pragë, raporton Klankosova.tv.
Ai shtoi se Mali i Zi mund të hyjë në BE në vitin 2028 sepse gjithçka është në dorën e tij, ndërsa Serbia ka problemin e Kosovës.
“Nëse nuk e zgjidhim çështjen e dialogut ndërmjet Beogradit dhe Prishtinës, mund të harrojmë integrimin e Ballkanit Perëndimor, jo vetëm të Serbisë dhe Kosovës. Mendoj se arritëm të bëjmë më të mirën e mundshme me marrëveshjen për normalizim që u miratua vitin e kaluar në Ohër, por ajo nuk u zbatua kurrë”, tha Lajçaku, transmeton Klankosova.tv.
Zyrtari evropian citoi mesazhin e presidentit francez Emmanuel Macron gjatë vizitës së tij në Beograd: “Rruga është e asfaltuar dhe quhet Ohër”.
“Megjithatë, mungon vullneti politik dhe shoqëria nuk është e gatshme për këtë. Përveç kësaj, në shkurt do të kemi zgjedhje parlamentare në Kosovë, prandaj është naive të presim një kthesë para zgjedhjeve. Por ne duhet të shohim një ndryshim të rëndësishëm në zbatim menjëherë pas zgjedhjeve”, tha Përfaqësuesi Special i Bashkimit Evropian për Ballkanin Perëndimor, Miroslav Lajçak.
