Ky është zyrtari i Gjykatës që po dyshohet për rastin e manipulimit me prona

Njësiti për Hetimin e Krimeve Ekonomike dhe Korrupsionit, në bashkëpunim të ngushtë me Policinë e Kosovës, sot ka zhvilluar një aksion në Agjencinë Kadastrale të Kosovës, si dhe në disa lokacione të tjera. Në këtë aksion po hetohen pesë persona të dyshuar, në mesin e tyre, sipas burimeve të Klan Kosovës, edhe zyrtari i Gjykatës, A.Bytyqi, transmeton Klankosova.tv. Sipas njoftimit të Prokurorisë Themelore në Prishtinë, ky aksion është realizuar në bazë të urdhëresës së Gjykatës Themelore në Prishtinë për kontroll ndaj të dyshuarve lidhur me veprën penale ‘’Keqpërdorimi i detyrës zyrtare apo Autoritetit Zyrtar’’, ‘’Falsifikimi i dokumenteve’’ dhe “Legalizimi i përmbajtjes  së pavërtetë’’ . Sipas dyshimeve, të bazuara,të pandehurit A.Q., dhe N.K., në bashkëveprim dhe pas një marrëveshje paraprake, kanë përdorur një dokument të falsifikuar të titulluar ‘’Kontratë për këmbim e paluajtshmërive’’  të datës 11.02.1966. Përmes këtij dokumenti është paraqitur në mënyrë të rreme kinse ka ndodhur një këmbim pronash në vitin 1966, me qëllim të përfitimit të kundërligjshëm pasuror. Gjatë hetimeve, është dyshuar se A.Q., dhe N.K., me ndihmën e personit  zyrtar A.Bytyqi, kanë arritur që dokumentin e falsifikuar të paraqesin si autentik, duke vulosur dhe përfshirë në arkivat e gjykatës, ndonëse një dokument i tillë nuk ka ekzistuar asnjëherë në evidencat zyrtare. Po ashtu, i dyshuari A.Bytyqi në cilësinë e personit zyrtar në Gjykatën Themelore në Prishtinë, dyshohet se ka keqpërdorur detyrën zyrtare duke krijuar dosje fiktive dhe duke mundësuar legalizimin e dokumentit të falsifikuar, me qëllim të përfitimit të kundërligjshëm për vete dhe persona të tjerë. Ndërkohë, të dyshuarit B.Shaqiri, dhe M.B., në cilësinë e personave zyrtar ne Agjencinë Kadastrale të Kosovës, dyshohen se kanë tejkaluar kompetencat e tyre, dhe në mënyrë të kundërligjshme kanë aprovuar ankesën e palës, përkatësisht të pandehurit N.K., duke obliguar komunën e Prishtinës që të regjistroj pronën në emër të tij. https://klankosova.tv/kembimi-i-rrejshem-i-pronave-dosja-e-prokurorise-zbulon-rolin-e-te-dyshuarve-mes-tyre-edhe-zyrtare111/ https://klankosova.tv/avokatja-e-bashkim-shaqirit-i-1eshte-bastisur-shtepia-tash-po-merret-ne-pyetje/