Kurti urohet nga zyrtari shtetëror gjerman, flasin për thellimin e bashkëpunimit në fusha të ndryshme

Në margjina të Konferencës së Sigurisë në Mynih, kryeministri Albin Kurti, u takua me Sekretarin e Shtetit për Punë të Brendshme të Gjermanisë, Hans-Georg Engelke. Sipas komunikatës për media, Kurti pranoi urimin dhe përgëzimet nga Sekretari i Shtetit Engelke për formimin e qeverisë së re, transmeton Klankosova.tv. Ndryshe, gjatë takimit, sipas njoftimit zyrtar, u theksua "zhvillimi ekonomik dhe progresi demokratik i shtetit tonë", ndërsa pjesë e bashkëbisedimit ishin edhe mundësitë për thellimin e mëtejmë të bashkëpunimit bilateral, edhe në fusha si siguria dhe lufta kundër krimit. “U diskutuan edhe çështje që ndërlidhen me qytetarët e Republikës së Kosovës në diasporë, përfshirë trajtimin e statusit të tyre shtetëror, një çështje tashmë e qartësuar dhe rregulluar në mënyrë që ata të mos konsiderohen më si shtetas të Serbisë, ndonëse ende ka raste me problematika të ngjashme”, theksohet në njoftim.