Kurti takohet me Odën Ekonomike Austriake, shprehet gatishmëri për forcim të marrëdhënieve

Kryeministri i Kosovës, Albin Kurti u takua me Odën Ekonomike Austriake dhe përfaqësues të bizneseve austriake. Në komunikatën për media të Kryeministrisë thuhet se Austria, si partnere e rëndësishme në zhvillimin ekonomik të Kosovës, vijon të ketë një rol domethënës në prosperitetin e vendit dhe avancimit demokratik të shtetit tonë, përcjell Klankosova.tv. Kurti, sipas komunikatës, shprehu vlerësimin e lartë për bashkëpunimin e ngushtë ndërmjet Kosovës dhe Austrisë, duke shprehur dhe gatishmërinë për të shikuar tutje format e mënyrat se si mund të bëhet më shumë e më mirë në marrëdhëniet mes nesh. "Ai i falënderoi tetë bizneset austriake të pranishme në takim por edhe përmes investimeve të tyre në Kosovë, pjesë e gjithsej 130 kompanive austriake të cilat veprojnë në vendin tonë. Ai theksoi gatishmërinë dhe vullnetin e plotë për të dëgjuar mbi përvojat dhe idetë e tyre si biznese që kontribuojnë në ekonominë tonë, si dhe mbi mundësitë për të zgjeruar investimet austriake në Kosovë", u tha në njoftimin e Kryeministrisë.