Kurti: Shëndetësia nuk është e kënaqshme, duhet llogarisim më shumë në parandalim sesa në shërim

Kryeministri në detyrë, Albin Kurti, sot ka qëndruar në Ferizaj për të parë gjendjen e kësaj komune në ballafaqimin me koronavirusin. Ai ka falënderuar kryetarin Agim Aliu për mikpritje dhe për angazhimin e tij në marrjen e masave për parandalimin e koronavirusit, njofton Klan Kosova. “Masat në Ferizaj kanë ndikuar që numri i të infektuarve të jetë i ulët. Prandaj, këto masa duhet ta vazhdohet në bashkëpunim me Ministrinë e Shëndetësisë dhe Qeverinë. U njoftova edhe për gjendjen në Spitalin e Ferizajt dhe Qendrat e Mjekësisë Familjare dhe angazhimin që po bën kryetari i komunës që të mos e lë padore edhe shëndetin e ekonomisë së Ferizajt që është shumë i rëndësishëm për Kosovën”. Kurti tha se në kuadër të Pakos Emergjente Fiskale janë edhe ndihmat për komunat e Kosovës, përmes së cilës synohet që të humbet normaliteti i jetesës. Në javët e prillit duhet të përqendrohemi maksimalisht në tri gjëra thelbësore dhe të thjeshta. Rrini në shtëpi, rrini të pastër dhe rrini në distancë”. “Sektori i shëndetësisë nuk është i kënaqshëm, andaj neve na duhet të llogarisim pakrahasimisht më shumë në parandalim sesa në shërim. Ju bëj thirrje që pavarësisht se është moti i mirë dhe kemi dëshirë të shëtisim dhe të dalim duhet t’i respektojmë udhëzimet e Qeverisë në detyrë dhe institucioneve shëndetësore. Siç kemi qenë shembull të ngelemi të tillë edhe kur ta kalojmë këtë pandemi”. Kurti tha se nuk duhet të ketë ndasi partiake duke thënë se duhet qëndruar bashkë në këtë betejë pa dallime. “Ne i kemi mbështetur të gjitha llojet e uniformave që janë në krye të detyrës në këtë luftë. Ato të kaltrat të policëve, të bardhat të mjekëve dhe infermierëve, ato të gjelbërtat të pjesëtarëve të ndryshëm që po kontribuojnë në parandalimin e pandemisë”. Kurti ripërsëriti se Grupi Punues i formuar nga Qeveria dhe në përbërje të katër ministrive do të bëjë vlerësimet nëpër komuna dhe në bazë të tyre do të merren edhe vendimet për masat kufizuese. “Vendimet dhe masat nuk janë marrë pse Qeveria ka pushtet, por për shkak të rekomandimeve të IKPSHK-së. Ne paraprihemi në bazë të tyre dhe më pas marrim vendime. Vendimet janë më shumë shkencore sesa demokratike”. Ndërsa, kryetari i Ferizajt tha se komuna e tij ka marrë masat e nevojshme, por se duhet vazhduar edhe me të tjera pasi që, siç tha ai, asnjëherë nuk janë të mjaftueshme për ta luftuar koronavirusin.