Lajmet e fundit
Kryeministri në detyrë, Albin Kurti, ka përkujtuar sot 558-vjetorin e vdekjes së Gjergj Kastriotit – Skënderbeut, duke e cilësuar atë si “personalitetin më të rëndësishëm dhe më të njohur në tërë historinë e shqiptarëve”.
Në një postim në Facebook, Kurti ka rikujtuar se më 17 janar 1468, Skënderbeu vdiq në Lezhë, “pas një çerekshekulli tejet intensiv në krye të rezistencës kundërosmane dhe përpjekjeve për ndërtimin e aleancave politike”.
Ai thekson se Skënderbeu, nga një fisnik arbër, u shndërrua në “strateg ushtarak dhe prijës politik ndër më të njohurit në Evropë”, duke udhëhequr qëndresën kundër osmanëve nga viti 1443 deri në vdekjen e tij, si dhe duke bashkuar fisnikët shqiptarë në Kuvendin e Lezhës më 1444.
Kurti vë në pah edhe aleancat e Skënderbeut me Mbretërinë e Napolit dhe Aragonës, si dhe marrëdhëniet diplomatike me Papatin, Raguzën dhe Venedikun, duke shtuar se “jehona e lavdive nga fitoret e arritura kundër osmanëve të pathyeshëm atë kohë, por edhe kundër serbëve në Ballkan e kundërshtarëve të Napolit në Itali, i dhanë Skënderbeut namin e një prej ushtarakëve më gjenial dhe prijësve më të paepur në Evropë”.
Sipas Kurtit, Gjergj Kastrioti – Skënderbeu u vendos nga rilindasit në shekullin e XIX si një nga shtyllat e kombformimit dhe shtetndërtimit te shqiptarët.
“Historia e tij asnjëherë nuk e ka humbur aktualitetin dhe as forcën për të inspiruar. Skënderbeu vazhdon të jetë edhe sot në qendër të identitetit kombëtar dhe historik shqiptar, si figurë përbashkuese për të gjithë shqiptarët kudo ku jetojnë nëpër botë”, tha ai.
Postimin e tij, Kurti e mbyll me thirrjen: “Lavdi ndër kohëra Gjergj Kastriotit, të mbiquajturit Skënderbe, heroit kombëtar të të gjitha epokave historike të shqiptarëve”. /Klankosova.tv
