Kurti me gruan dhe vajzën parakalojnë në tapetin e kuq në Festivalin e Kanës

Kryeministri Albin Kurti bashkë me gruan dhe vajzën e tij kanë parakaluar në tapetin e kuq në Festivalin e Kanës. Sonte në garë për “Palmën e Artë” është edhe filmi kosovar me metrazh të shkurtër “Pa vend” me regji të Samir Karahodës, premierën botërore të të cilit e ka ndjekur dje shefi i qeverisë kosovare me familjen e tij. Në festivalin prestigjioz të filmit garon edhe filmi tjetër nga Kosova, artistik e i metrazhit të gjatë, “Luaneshat e Kodrës” i regjisores së re Luàna Bajrami i cili garon për "Kamerën e Artë”. Gruaja e Albin Kurtit është parë e veshur me një fustan të gjatë e shumë elegant ngjyrë të verdhë, derisa e bija e tij e kishte veshur edhe sot fustanin e njohur si “Strawberry Dress” të disenjatores Lirika Matoshi. Për këtë të fundit dje u bë shumë zhurmë duke u vënë në pah çmimi i shtrenjtë i tij, në ndërkohë që qeveria sqaroi që fustani i Leas ashtu si edhe dy fustanet e gruas së tij Rita janë huazuar nga disenjatoret Teuta dhe Lirika Matoshi dhe të njëjtit do t’i kthehen atyre sërish. Por ndryshe tha kreatorja e këtij fustani që ishte bërë viral në rrjete sociale muaj më parë. Ajo në një postim të zëdhënëses së PSD-së, Natyra Kuçi, e cila kishte kritikuar kryeministrin për fustanin 500 dollarësh të së bijës tha se ajo vetë ia kishte dhuruar fustanin.