Kurti: Mbrojtja e parasë publike, parim kyç me të cilin duhet të udhëhiqen të gjitha politikat publike

Kryeministri i Kosovës, Albin Kurti, në sesionin e dytë të takimit me kryetarët e nënkryestarët e komunave të vendit, ku u diskutua për zhvillim ekonomik dhe investime, ka thënë se mbrojtja e parasë publike është parim kyç me të cilin duhet të udhëhiqen të gjitha politikat publike. "Mbrojtja e parasë publike është parim kyç me të cilin duhet të udhëhiqen të gjitha politikat publike, e kjo arrihet vetëm nëpërmjet menaxhimit të mirëfilltë të financave publike", ka thënë ai. Sipas tij, që nga fillimi i mandatit, kanë punuar në ndërtimin e mekanizmave që ndikojnë në avancimin e sistemit të buxhetimit e shpenzimit, e deri te vendosja e kontrolleve të brendshme për të siguruar mirë menaxhim e llogaridhënie. “Në këtë drejtim, kemi punuar në koncept-dokumentin për menaxhimin e financave publike, që shënon hapin e parë në drejtim të avancimit të legjislacionit, i cili ndërlidhet me forcimin e sistemit aktual të financave publike dhe adresimin e mangësive në arkitekturën aktuale administrative”, tha ai. Duke folur për angazhimin e qeverisë për mbështetjen e nivelit komunal, me qëllim të rritjes se mirëqenies së qytetarëve, kryeministri tha se si rezultat i rritjes rekord të të hyrave buxhetore, granti i përgjithshëm për vitin 2023, është miratuar nga Komisioni i Granteve me një rritje prej 32 për qind. “Pra, kemi rreth 255.2 milionë euro më shumë buxhet të ndarë nga niveli qendror për nivelin komunal. E në këtë Komision miratuam edhe politika të reja si angazhimi i 59 konsulentëve të karrierës në shkollat e mesme të ulëta, rritjen e numrit të asistentëve për fëmijët me nevoja të veçanta në 500, shtimin e 30 profesionistëve të TI-së, rritjen e numrit të personelit shëndetësor në shëndetësinë primare prej 299 profesionistëve, dhe mundësimin e realizimit të vizitave për gra shtatzëna e fëmijë dhe persona në kujdesin paliativ”, tha kryeministri Kurti. Kryeministri Kurti u kërkoi udhëheqësve komunalë, që të bashkëpunojnë më shumë me njëri-tjetrin dhe të bashkërendohen më shumë me mërgimtarët nga komunat e tyre, për rritjen e investimeve në vendlindje. Takimi punues me kryetarët e nënkryetarët e komunave të Kosovës, është organizuar nga zëvendëskryeministrja Emilija Redžepi. Në sesionin e parë të takimit u diskutua për sundimin e ligjit dhe të drejtat e njeriut, me theks te zbatimi i të drejtave të komuniteteve pakicë.