Kurti e njofton ambasadorin norvegjez për masat në parandalimin e përhapjes së koronavirusit

Kryeministri në detyrë, Albin Kurti, dje në zyrë e tij ka takuar ambasadorin e Norvegjisë në Kosovë, Jens Erik Grøndahl. Takimi për temë kryesore të diskutimit pati situatën e krijuar nga pandemia COVID-19. Me këtë rast, kryeministri në detyrë e njoftoi ambasadorin Grøndahl për masat e reja të Qeverisë të cilat për qëllim kanë parandalimin e shpërndarjes e virusit korona. Në prag të javëve më kritike në luftën kundër përhapjes së shpejtë të sëmundjes, Kurti theksoi përkushtimin e tij dhe Qeverisë për të kontrolluar në mënyrë sa më të suksesshme lakoren e përhapjes së pandemisë. Ai gjithashtu rikujtoi rëndësinë e një bashkëpunimi gjithëpërfshirës në këtë drejtim, me ç’rast kryeministri në detyrë Kurti ka telefonuar kryetarët e 38 komunave të Kosovës me të cilët ka diskutuar problemet dhe vështirësitë e tyre në përballje me pandeminë COVID 19, si dhe nevojën dhe format e mbështetjes nga Qeveria në detyrë, transmeton Klan Kosova.