Kurti Berishës për rastin e Kumanovës: Epitetin e padrejtë terrorist e ka thënë kolegia juaj

Deputeti nga radhët e Partisë Demokratike të Kosovës, Hisen Berisha, në kuadër të pyetjeve paralentare foli për të burgosurit për rastin e Kumanovës. Ai kërkoi nga kryeministri që të burgosurit të kthehen dhe të mbajn burgun në Kosovë, transmeton Klankosova.tv. Kurti tha se pala dënuese, Maqedonia e Veriut, duhet ta lajmërojë palën zbatuese, Kosovën, kur vendimi të ketë marrë formën e prerë. “Transferi i tyre bëhet individualisht dhe jo në grupe, poashtu procedura e transferimit fillon me kërkesën e personit që është në vuajte të dënimit, deri më tani nuk jemi njoftuar se është bërë zyrtarisht një kërkesë e tillë.” u shpreh i pari i ekzekutivit në fjalën e tij. Ai thotë se rasti i Kumanovës, aktualisht është në Gjykatën Supreme dhe nuk ka përfunduar. Kurse kur Berisha e pyeti se çfarë ka bërë që të burgosurit në Kumanovë të mos quhen terroristë, ai tha se këtë epitet ia ka dhënë, kolegia e tij. "Epitetin e padrejtë terrorist e ka thënë kolegia juaj, e tash ju kinse po brengoseni për djemtë e Kumanovës që mbahen në burg atje. Populli ynë e ka një fjalë të urtë për këtë shprehje e për këtë sjellje tuajën po atë unë juve sot këtu nuk po jua them." Pastaj reagoi edhe deputetja Blerta Deliu-Kodra dhe tha se sot u vërtetua kush ka qenë makineria manipuluese, duke iu referuar kryeministrit Kurti. “ E saktësoj qartë kryeministri me manipulimet që armata e udhëhequr prej tij i ka bërë gjatë gjithë kësaj kohe. Kështu që unë konsideroj që nuk duhet assesi të vijë me këtë manipulim që e bëri ai e që sot e lëshoi sallën pa e marrë përgjigjen nga unë. Të mos vijë e të mos manipulojë sepse po i ndërsen ata që i ka prapa që të veprojnë ashtu siç kanë vepruar përherë."