Në vitet e fundit, rrjetet sociale kanë kaluar nga hapësira argëtimi në platforma që ndikojnë drejtpërdrejt në ndërtimin e karrierave dhe krijimin e të ardhurave. TikTok-u, më shumë se çdo platformë tjetër, ka përshpejtuar këtë proces duke krijuar perceptimin se fama dhe fitimi financiar arrihen shpejt.
Megjithatë, pas këtij realiteti të idealizuar fshihet një proces kompleks që kërkon punë të vazhdueshme, strategji dhe aftësi profesionale. Në Kosovë, TikTok-u është bërë mjet i fuqishëm sidomos për të rinjtë, por shndërrimi i vëmendjes në të ardhura të qëndrueshme mbetet sfidë.
Derisa disa arrijnë bashkëpunime me brende dhe promovim biznesesh, të tjerët përballen me pasiguri dhe varësi nga algoritmi. Krijimi i përmbajtjes nuk është më spontan, por kërkon planifikim, analizë dhe ndërtim të besueshmërisë afatgjate.
Në këtë kontekst, perspektiva e ekspertit të rrjeteve sociale, Valon Canhasi nga Shkolla.ai sjell një qasje profesionale mbi fenomenin e TikTok-ut si burim të ardhurash.
Ai për Klankosova.tv foli në lidhje me atë se sa reale është sot mundësia që dikush në Kosovë të jetojë vetëm nga TikTok-u, duke thënë se një gjë e tillë nuk është edhe aq e lehtë.
“Mundësia ekziston, por nuk është as e lehtë dhe as e zakonshme. Në Kosovë, TikTok-u rrallëherë funksionon si burim i drejtpërdrejtë dhe i qëndrueshëm të ardhurash. Për shumicën e krijuesve, ai shërben më shumë si kanal për ndërtimin e audiencës sesa si platformë që siguron të ardhura të rregullta. Vetëm një numër i vogël arrin ta kthejë TikTok-un në burim kryesor jetese”, tha ai.
“Të ardhurat zakonisht vijnë nga disa burime njëkohësisht. Më të shpeshtat janë bashkëpunimet me brende, marketingu për produkte ose shërbime, shitjet përmes affiliate linqeve, promovimi i bizneseve personale, si dhe aktivitetet live me dhurata virtuale. Në praktikë, krijuesit më të suksesshëm janë ata që nuk mbështeten në një burim të vetëm, por ndërtojnë një model të kombinuar monetizimi”, u shpreh ai teksa foli për mënyrat kryesore përmes të cilave krijuesit në TikTok gjenerojnë të ardhura.
Sipas tij, në shumicën e rasteve bëhet fjalë për persona që kanë aftësi konkrete krijuese, si paraqitje para kamerës dhe përpunim të videove.
Këta njerëz, siç tha Canhasi, e kuptojnë se si ndërtohet një narrativë, si mbahet vëmendja e audiencës dhe si shndërrohet një ide e thjeshtë në përmbajtje të konsumueshme.
“Shpesh, ata kanë prapavijë në media, marketing apo dizajn, ose i kanë zhvilluar këto aftësi në mënyrë autodidakte. Kjo i dallon nga ata që e shohin TikTok-un vetëm si trend, pa pasur bazë reale krijuese apo strategjike”, tha ai.
Eksperti i rrjete sociale foli edhe në lidhje me atë se a është TikTok-u një burim i qëndrueshëm të ardhurash apo më shumë një rrezik financiar?
“Për një numër shumë të vogël krijuesish, TikTok-u është shndërruar në burim të qëndrueshëm të ardhurash. Megjithatë, në terma realë, bëhet fjalë për dhjetëra përdorues, ndërkohë që janë mijëra të tjerë që nuk arrijnë të sigurojnë të ardhura të qëndrueshme nga kjo platformë. Për shumicën, TikTok-u mbetet më shumë një rrezik financiar sesa një siguri, pasi të ardhurat varen nga algoritmi, trendet dhe faktorë që nuk janë në kontroll të krijuesit. Pa burime shtesë jashtë platformës, qëndrueshmëria është e vështirë”, u shpreh ai.
Canhasi shtoi se ndërtimi i një profili që gjeneron të ardhura kërkon kohë dhe angazhim të vazhdueshëm.
Zakonisht flasim siç tha ai, për 6 deri në 12 muaj punë serioze, publikim të rregullt të përmbajtjes, testim të vazhdueshëm dhe analizë të audiences dhe tha se rastet e suksesit të menjëhershëm ekzistojnë, por janë përjashtim dhe jo rregull.
Gjatë gjithë kësaj përvoje të atyre që kanë vendosur të merren me TikTok, mund të ndodhin edhe gabime, ku sipas Canhasit, më i shpeshti është ai se shumë krijues nuk ndërtojnë stilin e tyre, por kopjojnë trende ekzistuese, duke menduar se kjo mjafton për sukses.
“Kjo e bën përmbajtjen të ngjashme, të zëvendësueshme dhe pa identitet të qartë, duke e vështirësuar ndërtimin e një audience besnike”, shtoi ai, duke përmendur edhe një gabim tjetër.
“Një tjetër gabim i madh është barazimi i shikimeve me para. Shikimet sjellin vëmendje, por jo domosdoshmërisht të ardhura. Pa ofertë reale, pa strategji dhe pa lidhje të drejtpërdrejtë me monetizimin, shikimet mbeten vetëm numra”, tha Canhasi.
Ai bëri gjithashtu edhe dallimin mes përmbajtjes argëtuese dhe asaj edukative apo profesionale dhe asaj se kush fiton më shumë.
“Ka dallim të qartë. Përmbajtja argëtuese zakonisht sjell më shumë shikime, por më pak të ardhura afatgjata. Përmbajtja edukative ose ajo që ofron shërbime profesionale ka audiencë më të vogël, por gjeneron më shumë vlerë dhe të ardhura më të qëndrueshme. Financiarisht, zakonisht fiton ajo që zgjidh probleme konkrete”, u shpreh eksperti i rrjeteve sociale, i cili pati edhe këshilla për ata që po mendojnë ta lënë punën për t’u fokusuar vetëm në TikTok?
“Së pari, duhet kuptuar se krijimi i përmbajtjes në TikTok është punë e vështirë dhe kërkon konsistencë të lartë. Një video prej 30 sekondash shpesh kërkon shumë më tepër punë sesa duket: ideim, skenar, xhirim, përpunim, testim dhe disa tentativa derisa të arrihet rezultati final. Prandaj, TikTok-u duhet ndërtuar paralelisht me punën ekzistuese. Vetëm pasi krijimi i përmbajtjes sjell të ardhura të qëndrueshme për një periudhë më të gjatë dhe procesi është i qartë e i përballueshëm, mund të mendohet seriozisht për një angazhim të plotë”, shtoi ai.
Cahasi tha se mendon që viti 2026 do të shënojë fillimin e një ndryshimi të madh në mënyrën e krijimit të përmbajtjes në rrjetet sociale, ku sipas tij, në këtë fazë, inteligjenca artificiale do të ketë rol gjithnjë e më të rëndësishëm.
“Parashikimi im është se do të shkojmë drejt një modeli me dy lloje feed-esh: një me përmbajtje të gjeneruar nga AI dhe një tjetër me përmbajtje të krijuar nga njerëzit. Kjo do të ndikojë drejtpërdrejt në mënyrën se si audienca e percepton autenticitetin, kreativitetin dhe vlerën”.
“Në këtë kontekst, përmbajtja njerëzore do të fitojë rëndësi të re, sidomos ajo që ka identitet, përvojë reale dhe perspektivë unike. Ndërsa AI do ta rrisë sasinë e përmbajtjes, diferencimi do të vijë nga ajo që është personale dhe e pamundshme për t’u replikuar plotësisht nga teknologjia”, u shpreh ai për Klankosova.tv.
Një dëshmi që e zhvendos diskutimin nga teoria në përvojë konkrete është rrëfimi i influenceres Pranvera Osdautaj - Komani, ku ndryshe nga perceptimi i zakonshëm që e sheh krijimin e përmbajtjes si diçka të lehtë apo kalimtare, historia e saj tregon se rrjetet sociale mund të shndërrohen në një hapësirë serioze pune.
Së bashku me bashkëshortin e saj, fotografin Marjan Komani, ajo ka ndërtuar një model krijimi që mbështetet në origjinalitet, humor dhe lidhje të drejtpërdrejtë me audiencën.
Influencerja për Klankosova.tv tha se rrjetet sociale janë botë e mundësive dhe sipas saj, për këtë ende nuk janë të vetëdijshëm shumë njerëz të cilën po ashtu si me përqeshje e konsiderojnë “punë” krijimin e përmbajtjes dhe të qenit person me ndikim në rrjete sociale.
Ajo gjithashtu rrëfeu momentin kur vendosi të largohej nga puna e rregullt për t’i përkushtuar plotësisht kohën dhe energjinë TikTok-ut.
“Pakënaqësitë e mia ndaj mënyrës se si jam trajtuar dhe nënvlerësuar kanë filluar kohë më parë dhe në atë moment, në mars të vitit 2024 thash “boll” dhe u përgjigja negativisht një oferte qesharake që mi çonte poshtë gati 8 vite karriere më shumë mund”, tha ajo, duke theksuar se gjithsesi ndonjëherë ndjenë mungesë për punën e mëparshme.
“A e dua punën si moderatore? Absolutisht që po dhe ndonjëherë më mungon sepse ka qenë ëndrra ime dhe një punë që e kam bërë me shumë përkushtim”, tha ajo.
Gjithsesi, Pranvera nuk e mohoi se TikToku i ka krijuar një bazë të fortë dhe të sigurtë në shumë aspekte.
“A më ka krijuar TikTok-u një bazë të fortë dhe të sigurtë për të marrë guximin të them “boll”? Absolutisht që po. TikTok-u për mua u bë televizioni im dhe unë aty u bëra moderatore dhe aktore për një audiencë që ishte vetëm e imja dhe nën emrin tim. Një audiencë që pëlqen dhe shijon atë se çka ne krijojmë dhe e vlerëson atë. TikTok-u poashtu sjellë një Pranverë më ndryshe nga ajo e televizionit sepse këtu nuk ka kufizime”.
“Njerëzit arrijnë të njohin detaje të ndryshme të jetës me të cilat bashkëndjejnë. Dhe një gjë shumë thelbësore që unë dhe Marjani kemi kuptuar gjatë kësaj kohe, 2 vite e ca, është se njerëzit kanë nevojë të qeshin. Kanë nevojë për humor dhe për energji pozitive dhe ne na vjen mirë të arrijmë ta sjellim atë energji te më shumë se 500,000 njerëz”, tha ajo.
Influencerja tregon se puna në TikTok është shumë dinamike, megjithatë thekson se sjellë të mira të pakrahasueshme.
“Unë mbylla një derë për të hapur shumë të tjera përmes TikTok-ut dhe për këtë jam e lumtur. Ani pse nga një punë disa orëshe tani jam në një punë që pak a shumë të kërkon aktiv 24/7, TikTok-u më ka sjellë të mira të pakrahasueshme. Një familje të madhe, partnerë të besueshëm dhe të mira financiare”, tha Osdautaj - Komani.
Për fund, influencerja tha se TikTok-u dhe çdo rrjet tjetër social është punë, si çdo punë tjetër dhe sipas saj, nëse zgjedhë ta bësh në mënyrën e duhur, të jesh origjinal, spontan dhe konsistent përfitimet do i keni shumë të mëdha./Klankosova.tv
