Kreditet e Amorim po mbarojnë, tre ndeshjet e ardhshme vendimtare për fatin e tij

Trajneri i Manchester United, Ruben Amorim, është nën presion të madh pas humbjes 3-0 në derbin e së dielës kundër Cityt, me trajnerin e kritikuar që praktikisht përballet me tre ndeshje vendimtare për të shpëtuar punën e tij. United ka marrë vetëm katër pikë nga katër ndeshjet e para të Premier League këtë sezon dhe ndodhet në vendin e 14-t në tabelë. Amorim ka fituar vetëm tetë nga 31 ndeshjet e kampionatit që prej se mori drejtimin e United 10 muaj më parë dhe thuhet se po humb besimin e disa prej lojtarëve kryesorë të ekipit. Edhe pse drejtuesit e United këmbëngulin se Amorim ka ende mbështetjen e tyre të plotë dhe nuk kanë plane për ta zëvendësuar, kuptohet se ata do të vlerësojnë situatën dhe ecurinë e skuadrës pas tre ndeshjeve të ardhshme. United, që humbi derbin e Manchesterit 3-0 ndaj rivalëve lokalë City, pret Chelsean në Old Trafford të shtunën, më pas udhëton te Brentfordi, përpara se të presë në shtëpi skuadrën e promovuar Sunderland, përpara pushimit dyjavor të kombëtareve.