Lajmet e fundit
Rezultatet përfundimtare të zgjedhjeve të parakohshme të mbajtura më 28 dhjetor të vitit 2025 mund të shpallen më herët se sa ishte planifikuar, më 19 janar.
Lajmin e ka bërë të ditur zëdhënësi i Komisionit Qendror të Zgjedhjeve, Valmir Elezi, i cili njoftoi se sipas dinamikës së punës, shpallja e rezultateve mund të bëhet përpara afatit të parashikuar.
Ai shtoi se janë në fazën e përfundimit të aktiviteteve në të gjitha Qendrat Komunale të Numërimit dhe në fillimin e procesit të numërimit të fletëvotimeve që i takojnë votimit jashtë vendvotimeve të rregullta, transmeton Klankosova.tv
“Aktualisht, jemi në fazën e përfundimit të aktiviteteve në të gjitha Qendrat Komunale të Numërimit dhe në fillimin e procesit të numërimit të fletëvotimeve që i takojnë votimit jashtë vendvotimeve të rregullta, si: votimi jashtë Kosovës, votimi me kusht dhe votimi i personave me nevoja të veçanta. Në planifikimet e KQZ-së, përfundimi i aktiviteteve në QKN është paraparë të bëhet deri më 7 janar, por sipas dinamikës së punës kjo do të bëhet më shpejtë, gjatë kësaj fundjave”, deklaroi Elezi në Facebook.
Ai tha se numërimi i votave nga votimi në përfaqësitë diplomatike dhe nga votimi me postë ishte planifikuar të bëhet nga data 7 janar, por kjo tha se filloi më herët. Gjithashtu, edhe numërimi i votave me kusht dhe votave të personave me nevoja të veçanta ishte planifikuar të fillonte më 16 janar, por dinamika e punës, sipas Elezit, tregon se kjo mund të bëhet shumë më herët.
“Nga kjo mund të përfundojmë se edhe rezultatet përfundimtare të planifikuara për t’u shpallur më së largu deri më 19 janar, mund të shpallen më herët”, tha zëdhënësi i KQZ-së, Valmir Elezi. /Klankosova.tv
