Kosova së shpejti me Qendrën Nacionale të Xhudos

Kosova shumë shpejt do të bëhet me Qender Nacionale të Xhudos. Me këtë rast sot u nënshkrua memorandumi i bashkëpunimit nga ministrja në detyrë e Kulturës Rinisë dhe Sportit Vlora Dumoshi dhe kryetari i Federatës së Xhudos Agron Kuka. "Qëllimi i memorandumit është bashkëfinancimin në realizimin e projektit “Ndërtimi i Qendrës Nacionale të Xhudos në Pejë”, i cili do të realizohet gjatë këtij dhe vitit të ardhshëm, me një shumë të përgjithshme prej 460 mijë euro, nga të cilat MKRS-ja ndan mbi 300 mijë euro, ndërsa FXHK-ja do të ndajë 160 mijë euro për këtë projekt "- njofton Ministria e Kulturës,Rinisë dhe Sportit përcjell Klan Kosova. Pas takimit që e para e MKRS-së zhvilloi me kryetarin e Federatës së Xhudos dhe përzgjedhësin e Kosovës tha se sot është nisur konkretisht realizimi i projektit të madh për xhudon dhe sportin. "Me nënshkrimin e këtij memorandumi, ne sot kemi nisur konkretisht realizimin e një projekti të madh dhe me rëndësi jo vetëm për xhudistët dhe sportin por edhe për vendin tonë në përgjithësi, sepse përpos rolit praktik që do ta ketë Qendra Nacionale e Xhudos në Pejë, ajo do të jetë edhe një imazh në arenën ndërkombëtare për Kosovën sepse sporti i xhudos ka ndikuar shumë në afirmimin e vendit tonë. Kjo qendër do të jetë edhe një vatër për sportistët që do të vijnë në të ardhmen dhe do të jetë edhe një destinacion për vizitorët e huaj që janë të interesuar për suksesin dhe historikun e xhudos në vendin tonë". Ndërkaq, kreu i FXHK-së falënderoi ministren Dumoshi për përkrahjen dhe bashkëpjesëmarrjen e MKRS-së në këtë projekt jetik për xhudon në Kosovë. Ai u shpreh se me ndërtimin e këtij objekti, sportistët do të jenë edhe më të inkurajuar për suksese e rezultate të mëtejme ashtu që t’i sjellin medalje të reja Kosovës në xhudo, por edhe që do të fokusohen në nxjerrjen e talenteve të reja në xhudo.