Kosova fiton me simbole ndaj Spanjës, por jo me gola

Ka përfunduar ndeshja në mes të Spanjës dhe Kosovës me rezultat 3:1. Ndonëse Kosova nuk fitoi me rezultat ndaj Spanjës, një fitore simbolike e arriti kur kjo e fundit u 'dorëzua' dhe në stadiumin "Estadio La Cartuja de Sevilla" u intonua himni i vendit tonë dhe u vendos flamuri kaltëreverdh. Golin e parë për spanjollët e realizoi Daniel Olmo në minutën e 34-të, derisa epërsinë e ngriti Ferran Torres vetëm dy minuta pas golit të parë. Pjesa e parë e lojës Spanjë-Kosovë përfundoi me rezultatin 2:0. Ndërkaq "Dardanët" arritën ta ngushtojnë epërsinë me Besar Halimin i cili përfitoi nga një gabim i portierit dhe shënoi një gol fantastik nga gati gjysma e fushës në minutën e 70-të. Kurse për rezultatin përfundimtar 3:1 shënoi Gerard Moreno në minutën e 75-të. Kjo ndeshje është e dyta për Kosovën në kualifikimet për Kampionatin Botëror "Qatar 2022".