Kontrollohen lokalet e natës në Prizren, pesë të arrestuar – konfiskohen armë

Mbrëmjen e së shtunës, Policia dhe Prokuroria në Prizren e kanë realizuar një aksion të suksesshëm. Gjatë këtij aksioni janë arrestuar pesë persona, dhe janë gjetur e konfiskuar armë dhe mjete të ftohta. Qëllimi i aktivitetit në fjalë ka qenë garantimi i rendit dhe sigurisë publike. “Gjatë këtij operacioni janë kontrolluar disa lokale të natës (bar-lounge), ku si rezultat i kontrollit policor, katër personave të dyshuar u janë gjetur mjete të mprehta (thika) në brez, ndërsa një personi tjetër i është gjetur dhe sekuestruar një armë zjarri. Pesë të dyshuarit janë arrestuar, intervistuar në prani të avokatëve mbrojtës, dhe me vendim të prokurorit të shtetit janë dërguar në ndalim policor për 48 orë”, thuhet në njoftimin e policisë transmeton Klankosova.tv. “Armët dhe mjetet e sekuestruara do të shërbejnë si prova materiale në procedurën penale që është iniciuar ndaj të dyshuarve për veprën penale: “Mbajtje në pronësi, kontroll ose posedim të paautorizuar të armëve”. Policia e Kosovës mbetet e përkushtuar në ofrimin e sigurisë për të gjithë qytetarët dhe në parandalimin e veprimtarive të kundërligjshme”, thuhet tutje në njoftim.