Konjufca për president? Flet vetë ministri: Nuk duam ta vendosim opozitën para aktit të kryer

Ministri i Punëve të Jashtme i Kosovës, Glauk Konjufca, ka folur për çështjen e presidentit, duke hedhur poshtë “pretendimet” se ai mund të ketë qenë opsion i LVV-së për këtë pozitë. Gjatë një konference për media, pas takimit me homologen nga Shqipëria, Elisa Spiropali, kryediplomati tha se mazhoranca kësaj radhe nuk ka dashur, siç u shpreh ai, “ta mbështesë për muri” opozitën. Sipas tij, kjo është arsyeja pse kanë ndodhur edhe takimet e kryeministrit Albin Kurti me liderët opozitarë ditëve të fundit. “Kësaj radhe nuk po foli me emra të partive politike, por po flas me koncepte të mazhorancës në Kuvend. Ajo mazhorancë që është prej 66 në Kuvend, ne jemi bindur që nuk ka mundësi përmes një emri që propozohet të marrim edhe votën e garantuar të opozitës për t’i bërë 80, ky është konstatimi i mazhorancës, nuk po them që është absolut, por me përafërsi, ky është konkludimi i mazhorancës, ndoshta e kemi gabim, ndoshta mirë, por ky është”, deklaroi Konjufca, njofton Klankosova.tv. “Pra konkludimi është që përmes një emri të përveçëm, ne mos me e mbështet për muri opozitën, pra këtë duhet ta votoni, për këtë arsye Albin Kurti ka bërë thirrje me i taku kryetarët e partive opozitare. I ka përfunduar tashmë takimet, i ka pasur dje dhe pardje, mendoj që ky është lajm i mirë për Kosovën. Është pjekuri e re e skenës politike sepse është përpjekje e mirë e sinqertë që së bashku të mund së pari të ulemi e ta kuptojmë njëri-tjetrin se çka po synojmë më saktë”. Në pyetjen direkte të gazetarëve se a ka qenë ai opsion për president, Konjufca u përgjigj: “A jam unë opsion? Jo, nuk është shtruar në këtë kontekst që VV-ja ta propozojë një president, po duam ta shmangim. Se kjo është me e vendos opozitën para aktit të kryer, ky nuk është qëllimi kësaj radhe i mazhorancës”, tha ai, njofton Klankosova.tv.