Konfiskohet BMW-ja 140 mijë euroshe, Tirana shpall në kërkim kosovarin (VIDEO)

Një shtetas nga Kosova, është shpallur në kërkim nga Policia e Tiranës. Sipas njoftimit të Policisë së Shtetit, ai dyshohet se ka trafikuar në Shqipëri një BMW M-8 në vlerë prej 140 mijë eurosh. Vetura dyshohet se ishte vjedhur në Gjermani. Operacioni policor ishte koduar "Stolen Line". "Shkon 5 numri i automjeteve të sekuestruara që nga nisja e operacionit. Sekuestrohet 1 automjet tip ‘BMW M-8’, me vlerë rreth 140 000 euro, i dyshuar i vjedhur në Gjermani. Procedohet penalisht blerësi i automjetit të trafikuar, njëkohësisht drejtues i tij, në momentin e ndalimit në Vorë. Identifikohet dhe shpallet shtetasi kosovar që dyshohet se ka trafikuar këtë automjet në Shqipëri. Materiali shton se specialistët e Seksionit për Hetimin e Trafiqeve të Paligjshme, në kuadër të operacionit “Stolen line”, gjatë punës hetimore kanë konstatuar një rast tjetër të trafikut të automjeteve luksoze të vjedhura jashtë shtetit", thuhet në njoftim transmeton Klankosova.tv.