Komunat e dërgojnë në Kushtetuese Ligjin për tatimin në pronë, Totaj pret masë mbrojtëse

Asociacioni i Komunave të Kosovës (AKK), e ka dërguar në Gjykatën Kushtetuese Ligjin për Tatimin në Pronë. Dorëzimin e kërkesë për vlerësimin e ligjshmërisë së këtij ligji e bënë drejtori i AKK-së, Sazan Ibrahimi dhe kryetari i Prizrenit, Shaqir Totaj, shkruan EO. Totaj, pas dorëzimit të kërkesës, tha se pas themelimit të Gjykatës Kushtetuese, komunat për herë të parë e bëjnë një kërkesë të tillë. “Kjo sepse kemi të bëjmë me ndërhyrje në kompetencat vetanake të komunave, për sa i përket autonomisë financiare, dhe ndërhyrje direkte në tentim të zvogëlimit të të hyrave buxhetore që qeveria do të mund të shkaktonte po që se ky ligj miratohet. Prandaj, ne e pamë të udhës të kërkojmë një sqarim nga Gjykata Kushtetuese, dhe njëkohësisht derisa vendimi të merret, kërkuam një masë mbrojtëse që të mos kemi dëme”, tha Totaj, raporton Klankosova.tv. Ai tha se problem të njëjtë me komunën që ai e drejton, kanë edhe komunat tjera. Kryetari i Prizrenit tha se është i sigurt që Gjykata do ta aprovojë kërkesën e tyre për një masë sigurie, para datës së skadimit të afatit për të marrë një vendim të tillë. “Dëmi për të gjitha komunat do të jetë rreth 30 milionë euro. Te Prizreni, dëmi do të jetë rreth 3 milionë euro, me çka do të dëmtoheshin shumë projekte të nisura”, potencoi ai. Ky ligj parashihte faljen e 100 euro të tatimit në pronë për të gjithë qytetarët për vitin 2023. Në lidhje me reagimin e ministrit të Financave, Punës dhe Transfereve, Hekuran Murati, Totaj tha se “fjala hipokrizi është fjalë e rëndë dhe nuk duhet përdorur fjalë të tilla”. “Ministrit i dëshiroj vikend të këndshëm dhe të relaksohet pak e të mësohet me një gjuhë më profesionale, më demokratike, e jo fjalë të tilla si fjala hipokrizi”, u shpreh Totaj. Ministri Murati e ka quajtur “absurde” dhe “hipokrizi” paralajmërimin e Asociacionit të Komunave të Kosovës për dërgimin e Ligjit për Tatimin në Pronën e Paluajtshme në Gjykatën Kushtetuese. /Klankosova.tv