Komandant Topi u arrestua për pengim të drejtësisë, thotë ZPS-ja

Zyra e Prokurorit të Specializuar (ZPS) arrestoi në Kosovë Haxhi Shalën, ish-komandant “Topin”, në bazë të një fletarrestimi dhe urdhri për transferim të lëshuar nga Gjykatësi i Procedurës Paraprake të Dhomave të Specializuara të Kosovës. Në njoftimin zyrtar të ZPS-së thuhet se ai është transferuar në Objektin e Paraburgimit të Dhomave të Specializuara të Kosovës në Hagë dhe do të dalë para Gjykatësit të Procedurës Paraprake të Dhomave të Specializuara të Kosovës pa vonesa të panevojshme. ZPS-ja thotë se “fletarrestimi lidhet me krime kundër administrimit të drejtësisë”. Tutje thuhet se EULEX-i ka dhënë mbështetje operative dhe logjistike për ZPS-në, sikurse edhe Policia e Kosovës. Zyra e Prokurorit të Specializuar thotë se “e merr jashtëzakonisht seriozisht pengimin e drejtësisë dhe do të vazhdojë të hetojë e ndjekë penalisht cilindo dhe të gjithë ata që përfshihen në çdo rast, përfshirë ata që frikësojnë apo ndërhyjnë tek dëshmitarët, ose ofrojnë mbështetje financiare apo të ndonjë forme tjetër për vepra të tilla penale”. Pas arrestimit të Shalës, Prokurorja e Specializuar Kimberly West konfirmoi se mbrojtja e dëshmitarëve mbetet një prioritet për ZPS-në. “Është shumë e rëndësishme që të garantohet që qytetarët e Kosovës të flasin për të thënë të vërtetën dhe pa kërcënime për përvojat e tyre, jo vetëm që ky institucion të jetë i aftë të japë drejtësi por edhe për sundimin e ligjit në Kosovë”, tha West. ZPS-ja, shtoi ajo, “do të vazhdojë të bëjë çdo gjë brenda fuqive të saj për të mbrojtur viktimat e dëshmitarët dhe për të vënë para përgjegjësisë ata që shkelin ligjet e Kosovës për interesat e tyre private”.