Koha më e mirë e stërvitjes ndryshon për burrat dhe gratë, thotë studimi amerikan

Ushtrimi është i mirë për ju sa herë që e bëni, por koha e ditës për të arritur rezultatin më të mirë mund të jetë e ndryshme për gratë dhe burrat, sipas një studimi amerikan. Ai zbuloi se gratë djegin më shumë yndyrë trupore gjatë stërvitjes në mëngjes, ndërsa mbrëmjet numërohen më shumë për burrat. Shumica e asaj që dihet për këtë temë bazohet në studimet mbi burrat, thonë studiuesit. Dallimet në hormone, në orët biologjike dhe ciklet gjumë-zgjim ndërmjet gjinive, të gjitha mund të luajnë një rol. Studimi i 30 burrave dhe 26 grave, të gjithë aktivë dhe të shëndetshëm, dhe midis 25 dhe 55 vjeç, zgjati 12 javë dhe monitoroi efektet e një programi të ndryshëm fitnesi, i cili përfshinte stërvitje, sprint, rezistencë dhe qëndrueshmëri. Njëri grup ushtroi për një orë para orës 08:30, ndërsa grupi tjetër ndoqi të njëjtat aktivitete në mbrëmje, nga ora 18:00 deri në 20:00. Të gjithë pjesëmarrësit ndoqën një plan ushqimi të krijuar posaçërisht. Studiuesit testuan presionin e gjakut dhe yndyrën e trupit të të gjithëve gjatë studimit, si dhe fleksibilitetin, forcën dhe fuqinë aerobike të tyre në fillim dhe në fund. Të gjithë ata që morën pjesë në studim përmirësuan shëndetin dhe performancën e tyre të përgjithshme gjatë provës 12-javore, pavarësisht se kur ushtruan. “Koha më e mirë për stërvitje është koha më e mirë që mund ta bëni dhe ta përshtatni atë në orarin tuaj”, thotë Dr Paul Arcerio, autori kryesor i studimit dhe profesor i shëndetit dhe shkencave fiziologjike njerëzore në Nju Jork. Bazuar në rezultatet, gratë e interesuara për të reduktuar yndyrën rreth mesit dhe për të ulur presionin e gjakut, duhet të synojnë të ushtrojnë në mëngjes, thotë Dr. Arcerio. Kjo është e rëndësishme sepse yndyra e barkut mbështillet rreth organeve të brendshme të trupit, duke përfshirë mëlçinë, dhe mund të jetë e rrezikshme. Megjithatë, ai thotë se gratë që përpiqen të përmirësojnë forcën e muskujve në pjesën e sipërme të trupit, duhet të bëjnë ushtrime në mbrëmje. Por stërvitja në mbrëmje u zbulua se ishte ideale për burrat e interesuar në përmirësimin e shëndetit të zemrës dhe metabolizmit, si dhe mirëqenien emocionale, tha Dr Arcerio. Nuk është e qartë saktësisht pse përgjigjet e burrave dhe grave ndaj kohës së stërvitjes ishin kaq të ndryshme, dhe studiuesit thonë se nevojiten më shumë kërkime për të zbuluar më shumë. Ata thonë se gratë mund të djegin më shumë yndyrë trupore në mëngjes, sepse ato kanë më shumë gjasa të kenë yndyrë të tepërt në bark. Ritmet e brendshme të trupit mund të jenë gjithashtu një faktor.