Koalicioni për Familjen në Hajvali: Të angazhuar për të ofruar një program politik që mbështet çdo familje

Koalicioni për Familjen zhvilloi një tubim masiv në Hajvali, ku morën pjesë qytetarë të shumtë dhe drejtues të rëndësishëm të koalicionit. Gjatë këtij tubimi, përveç liderëve të koalicionit, Eman Rrahmani, Selim Pacolli, Ferid Agani dhe Fatmir Smajli, një mbështetje të fuqishme dhe të veçantë për koalicionin dha edhe kryetari i AKR-së, Behgjet Pacolli. I pranishëm në këtë ngjarje ishte edhe ish-komandanti i Ushtrisë Çlirimtare të Kosovës, Adem Shehu, i cili theksoi se kishte ardhur enkas nga Shqipëria për të mbështetur Koalicionin për Familjen, pasi, siç tha ai, "familja është e shenjtë." Në fjalën e tij, Behgjet Pacolli theksoi rëndësinë e bashkëpunimit të fortë mes qytetarëve dhe koalicionit, duke garantuar një të ardhme më të mirë për familjet kosovare. Ai theksoi mbështetje të plotë për kandidatët e koalicionit dhe apeloi qytetarët që të angazhohen fuqishëm për të mbështetur kandidaturat e koalicionit për deputetë në zgjedhjet e ardhshme. Në njoftimin e lëshuar thuhet se drejtuesit e koalicionit falënderuan qytetarët e Hajvalisë për praninë dhe angazhimin e tyre të jashtëzakonshëm, duke shprehur mirënjohje për mbështetjen që dhanë gjatë këtij tubimi. Ata theksuan se ky ishte vetëm fillimi i një fushate të fuqishme për mbrojtjen e interesave të familjeve kosovare dhe për një të ardhme më të mirë për vendin. Gjatë tubimit, u prezantuan gjithashtu kandidatët për deputet nga Komuna e Prishtinës, "të cilët do të paraqesin angazhimin dhe përkushtimin e tyre për zhvillimin e Kosovës dhe përmirësimin e mirëqenies së qytetarëve". "Koalicioni për Familjen mbetet i angazhuar për të ofruar një program politik që mbështet çdo familje dhe garanton përmirësimin e kushteve të jetesës për të gjithë qytetarët e Kosovës". /Klankosova.tv