Lajmet e fundit
Sot gjatë ditës, Gjykata Themelore e Prishtinës ua ka caktuar masën e paraburgimit dy pronarëve të agjencisë “Prishtina Jet”, të cilët dyshohen se kanë mashtruar qytetarët me bileta udhëtimi.
Për këtë mashtrim të qytetarëve nga kjo agjenci, Kiks Kosova në Klan Kosova kishte raportuar qysh në muajin prill.
M.K. dhe A.B. dyshohen se në bashkëkryerje, përmes agjencisë turistike “Prishtina Jet”, iu kanë shitur bashkatdhetarëve bileta fiktive për udhëtim me aeroplan nga shtetet e perëndimit në Kosovë me një çmim shumë më të lirë sesa çmimi aktual, të cilat fluturime nuk janë realizuar edhe përkundër pagesave që janë bërë nga të dëmtuarit.
Të njëjtit dyshohen se, pos mashtrimit, i janë shmangur edhe tatimit.
Në ndërkohë, Policia i ka ftuar të paraqiten të gjithë ata që janë mashtruar me bileta aeroplani të lëshuara nga kompania “Prishtina Jet”.
“Ftojmë të gjithë ata që kanë rënë pre e mashtrimeve më bileta aeroplani të lëshuara nga kompania 'Prishtina Jet' të paraqitën në polici, në mënyrë që secili rast të trajtohet nga ana e policisë dhe që të sigurohen prova shtesë për këtë rast. Palët mund të paraqitën te hetuesit në Njësitë Rajonale për Hetimin e Krimeve Ekonomike dhe Korrupsionit të PK-së, në: Prishtinë, Mitrovice- Jug, Mitrovice Veri, Pejë, Prizren, Gjakovë, Ferizaj dhe Gjilan,” thotë njoftimi i policisë.
