Kina paralajmëron Panamanë pas anulimit të kontratës së kompanisë nga Hong Kongu

Kina ka paralajmëruar Panamanë për pasoja të rënda politike dhe ekonomike pasi Gjykata e Lartë e këtij vendi anuloi kontratën e kompanisë nga Hong Kongu, CK Hutchison, për operimin e dy porteve strategjike në Kanalin e Panamasë. Zyra për Çështjet e Hong Kongut dhe Makaos në Pekin e cilësoi vendimin gjyqësor si absurd, të turpshëm dhe një shkelje serioze të të drejtave të ligjshme të ndërmarrjeve kineze, duke akuzuar Panamanë se ka vepruar nën presionin e një fuqie hegjemoniste. Vendimi i gjykatës panameze erdhi pas deklaratave të presidentit amerikan Donald Trump, i cili kërcënoi se ShBA mund të marrë kontrollin e kanalit, duke pretenduar se ai ishte de facto nën ndikim kinez. CK Hutchison njoftoi se ka nisur procedura arbitrazhi ndërkombëtar kundër Panamasë dhe se po shqyrton hapa të mëtejshëm ligjorë. Ndërkohë, autoritetet panameze konfirmuan se kompania daneze Maersk do të marrë përkohësisht operimin e porteve. Kanali i Panamasë përpunon rreth 40 për qind të trafikut të kontejnerëve të ShBA-së dhe rreth 5 për qind të tregtisë botërore./Klankosova.tv