Lajmet e fundit
Shkrimtari do flasë dhe për romanin e ri “Shpërngulja e të vdekurve”.
Shkrimtari dhe analisti i njohur, Kim Mehmeti, do të jetë më 30 tetor, ora 17.00 në një diskutim përballë shkrimtarit dhe publicistit të njohur nga Mali i Zi, Andrej Nikolaidis, në sallën e Teatrit Eksperimental “Kujtim Spahivogli”.
Një bashkëbisedim që pritet të jetë interesant nga profili që mbajnë dy autorët, që janë dy zëra të rëndësishëm për sa u përket zhvillimeve politike dhe kulturore në rajonin e Ballkanit. Nikolaidis, përveçse romancier, ka pasur poste si këshilltar i presidentit të Parlamentit të Malit të Zi.
I lindur në Bosnjë, ai ka qenë tepër i ndjeshëm ndaj zhvillimeve në vendin e origjinës, duke bërë një sërë artikujsh për këtë çështje. Fitues i çmimit europian për letërsinë në vitin 2011, ai është dhe një ndër autorët më të lexuar të brezit të tij.
Kim Mehmeti është një autoritet në fushën e mendimit në hapësirën shqiptare. Në këtë bisedë, ai do të flasë dhe për romanin e tij të ri, “Shpërngulja e të vdekurve”, botuar nga shtëpia botuese “Saras”.
Një roman i shkruar me stilin e një autori që e njeh mirë gjuhën e letrave, por që mbart brenda jo vetëm një rrugëtim personal por dhe historik.
Romani i Mehmetit nuk është vetëm një sprovë e mrekullueshme letrare, por dhe një sprovë e thellë mbi identitetin tonë, për të cilin flasim kaq shumë këto kohë, shkruan Gazeta Shqip.
