Kërkohet paraburgim ndaj tre të arrestuarve për krime të luftës në Kosovë

Të hënën tre persona u arrestuan për krime të luftës në Kosovë. Derisa sot, Prokuroria Speciale, ka bërë kërkesë për caktimin e masës së paraburgimit. Kjo u konfirmua për Klankosova.tv nga zëdhënësja e PSRK-së, Liridona Kozmaqi. “Ju informoj se prokurori i çështjes për të cilën keni pyetur, nga Prokuroria Speciale e Republikës së Kosovës, ka paraqitur në gjykatë kërkesën për caktim të paraburgimit”, deklaroi ajo për Klankosova.tv. Tre të arrestuarit, dyshohet se në cilësi të gardianëve-zyrtarëve korrektues në burgun e Prishtinës dhe Qendrën Korrektuese të Lipjanit kanë maltretuar, rrahur, torturuar të ndaluarit shqiptarë. “Fillimisht në Lipjan në dy lokacione të ndara, janë lokalizuar dhe arrestuar i dyshuari B.T. mashkull dhe e dyshuara N.Č. (femër). Në vazhdimësi të aktiviteti operativ në Prishtinë është lokalizuar dhe arrestuar edhe i dyshuari i tretë M.I. mashkull. Ata dyshohen për veprën penale: “Krime lufte kundër popullatës civile” të kryer gjatë vitit 1998-1999 në Burgun e Prishtinës dhe atë të Lipjanit, në cilësi të gardianëve-zyrtarëve korrektues në Burgun e Prishtinës dhe Qendrën Korrektuese në Lipjanit kanë marrë pjesë në maltretimin, rrahjen, torturimin fizik dhe psikik te të ndaluarve shqiptarë”, thuhej në njoftimin e djeshëm transmeton Klankosova.tv.