Keqpërdorimet e votave në Deçan e Junik, intervistohen 30 të dyshuar

30 persona janë duke u intervistuar lidhur me dyshimet për manipulimet me vota në komunën e Deçanit dhe Junikut. Ky numër u konfirmua për gazetarin e Klan Kosovës, Kastriot Tahiri nga Prokuroria Themelore në Pejë. Ndërkohë, prokuroria përmes një komunikate për media ka njoftuar se nga dita e sotme ka filluar procesi i intervistimit të komisionarëve lidhur me dyshimet për keqpërdorime gjatë procesit të numërimit të votave të kandidatëve të subjekteve politike, me qëllim të sqarimit dhe zbardhjes së plotë të të gjitha rrethanave të këtij rasti, transmeton Klankosova.tv. Autorizimi i parë për ndërmarrjen e veprimeve hetimore është lëshuar më 19 janar nga Kryeprokurorja e Prokurorisë Themelore në Pejë, Lumturije Vuçetaj, ndërsa veprimet e mëtejshme hetimore po ndërmerren me autorizimet e prokurorëve të caktuar nga Kryeprokurorja, në koordinim të ngushtë me Hetimet Rajonale të Policisë së Kosovës në Pejë. https://klankosova.tv/manipuluesit-e-votave-ne-decan-e-junik-nen-hetim-nga-prokuroria/