KEK-u konfirmon daljen e A3-shit nga prodhimi, thotë se është situatë e përkohshme

Pak pas orës 20:00, Klankosova.tv raportoi se blloku A3 i TC Kosova A kishte dalë jashtë sistemit.

Kjo madje u konfirmua edhe në të dhënat e publikuara të gjenerimit “live” nga TC Kosova A.

Por, për situatën e krijuar, KEK-u reagoi vetëm pas raportimit në Klankosova.tv.

Korporata tha se dalja e A3 nga prodhimi është situatë e përkohshme, teksa shtoi se operimi i sistemit mbetet i qëndrueshëm.

https://klankosova.tv/bie-blloku-a3-i-termocentralit-kosova-a/

“Njësia A3 ndalet përkohësisht nga operimi – operimi i sistemit mbetet i qëndrueshëm. Ekipet profesionale dhe teknike të KEK sh.a. janë duke realizuar verifikimet dhe kontrollimet e nevojshme për të identifikuar shkakun dhe për të ndërmarrë masat e duhura për sanimin e situatës, në përputhje me procedurat teknike operative”, u tha në njoftimin e KEK-ut.

Korporata tha se operimi i sistemit elektroenergjetik po vazhdon në mënyrë të qëndrueshme dhe të kontrolluar, pasi aktualisht po operon me katër njësi gjeneruese: A4, A5, B1 dhe B2, “në përputhje me planin e prodhimit dhe bilancin energjetik të aprovuar”.

“Njësia e pestë aktivizohet sipas nevojës dhe parametrave teknikë, me qëllim të adresimit të rritjes së konsumit, pa cenuar stabilitetin dhe sigurinë operative”, tha KEK-u.

Redaksia e Klan Kosova ka dërguar pyetje në së paku gjashtë raste në drejtim të Korporatës Energjetike të Kosovës vetëm ditëve të fundit mbi situatën e krijuar, por në asnjërin nga rastet përgjigje nuk ka pranuar. /Klankosova.tv