Lajmet e fundit
Notre Dame do të ofrojë një sfond dramatik për kthimin e Donald Trumpit në skenën gjeopolitike këtë fundjavë pasi presidenti i zgjedhur i ShBA-së do të bëjë vizitën e tij të parë në Evropë që nga zgjedhjet presidenciale.
Katedralja, e cila u shkatërrua nga një zjarr në vitin 2019, është rindërtuar me 700 milionë euro që zgjati pesë vjet dhe u mundësua me donacione nga 150 vende.
Festimet për hapjen e saj do të zgjasin dy ditë, duke filluar me një fjalim të presidentit francez, Emmanuel Macron.
Por për Macronin, ai që duhet të jetë një moment triumfi vjen në një kohë krize kombëtare, vetëm disa ditë pasi kryeministri i tij u rrëzua në një votë mosbesimi dhe së fundmi dha edhe dorëheqje.
Duke e komplikuar situatën në Francë edhe më shumë, Komisioni Evropian po finalizon një marrëveshje tregtare të vonuar prej kohësh midis BE-së dhe bllokut Mercosur të Amerikës së Jugut që Franca thotë se përbën një kërcënim ekzistencial “të papranueshëm” për industrinë e saj bujqësore.
Bëhet e ditur se Ursula Von der Leyen, presidentja e KE-së, pritet të shkojë në Paris për të marrë pjesë në ceremoninë e hapjes së katedrales së bashku me rreth 50 liderë të tjerë botërorë, duke përfshirë presidentin në largim të ShBA-së, Joe Biden dhe gruan e tij, Jill.
Papa Françesku nuk do të jetë i pranishëm, pasi në shtator kishte njoftuar se në vend të kësaj do të bënte një vizitë historike në ishullin francez të Korsikës, shkruan "The Guardian", transmeton Klankosova.tv.
Shkaku i saktë i flakëve në katedrale nuk u zbulua kurrë, por hetuesit besojnë se ishte aksidental, i nisur nga një cigare ose një qark i shkurtër i sistemit elektrik.
Para zjarrit, rreth 12 milionë njerëz në vit vizitonin Notre Damen.
Numri i vizitorëve pritet të jetë më i lartë pas rihapjes.
Ndërsa hyrja do të mbetet falas, vizitorëve do t’u duhet të rezervojnë përmes një sistemi biletash online.
