Lajmet e fundit
Vjena është e gatshme të jetë nikoqire e negociatave mes Ukrainës dhe Rusisë, ka thënë kancelari austriak Karl Nehammer.
Propozimi i tij vjen pasi presidenti rus, Vlladimir Putin ka deklaruar të enjten (5 shtator) se Moska “asnjëherë nuk ka refuzuar të negociojë”, duke shtuar se bisedimet për paqe me Ukrainën duhet të bazohen në dokumentet e Stambollit, raporton “kyivindependent”.
Kievi dhe Moska kanë zhvilluar bisedime të paqes në Stamboll më 2022, por asnjë rezultat nuk është arritur.
“Çdo negociatë duhet të zhvillohet pa parakushte dhe në nivel sy më sy. Austria do të jetë e gatshme të mbështesë një paqe të drejtë dhe të qëndrueshme të bazuar në ligjin ndërkombëtar dhe që shërbejë si vend për negociata si selia e OSBE-së”, shkroi Nehammer në X, transmeton Klankosova.tv.
Në qershor, Putini pati deklaruar se si kusht për negociata për paqe, trupat ukrainase duhet të largohen nga Donetsku, Luhansku, Khersoni dhe Zaporizhzhia. Ai pati shtuar se Ukraina duhet t’i njohë aneksimet ilegale të Rusisë të rajoneve ukrainase dhe të heqë dorë nga ambiciet për anëtarësim në NATO.
E presidenti ukrainas Volodymyr Zelensky kishte refuzuar këto kushte, duke thënë se ultimatumi i Putinit ishte “ringjalle e nazizmit”. /Klankosova.tv
