Lajmet e fundit
Shefja e Politikës së Jashtme të Bashkimit Evropian, Kaja Kallas, ka reaguar për rrëzimin e aeroplanit të kompanisë së Azerbajxhanit.
Në një postim në platformën X, ajo ka theksuar se raportimet se të shtënat ruse mund të kenë shkaktuar rrëzimin e avionit të Azerbajxhanit "janë një rikujtim i zymtë i MH17", duke i referuar aeroplanit të Malajzisë që u rrëzuar më 17 korrik të vitit 2024 dhe u qëllua nga forcat e mbështetura nga Rusia.
"Unë bëj thirrje për një hetim ndërkombëtar të shpejtë dhe të pavarur".
"Lutjet tona janë me familjet dhe miqtë e viktimave. Iu uroj shërim të shpejtë të lënduarve", ka thënë Kallas.
Avioni i linjës së Azerbajxhanit është rrëzuar në Kazakistan, duke vrarë 38 nga 67 personat në bord.
Si u rrëzua avioni?
Embraer 190 i Azerbajxhanit Airlines ishte rrugës nga kryeqyteti i Azerbajxhanit, Baku për në qytetin rus të Grozny në Kaukazin e Veriut të mërkurën, kur u devijua për arsye që ende nuk janë plotësisht të qarta. Ai u rrëzua teksa po tentonte të ulej në Aktau, Kazakistan, pasi fluturoi në lindje përtej Detit Kaspik.
Avioni u rrëzua pranë bregut rreth 3 kilometra nga Aktau. Pamjet e celularëve që qarkullonin në internet dukej se tregonin avionin duke bërë një zbritje të pjerrët përpara se të godiste tokën dhe të shpërthente në zjarr.
Ekipet e shpëtimit kanë dërguar në spital 29 persona që i mbijetuan përplasjes.
Si reagoi Azerbajxhani?
Azerbajxhani mbajti një ditë zie mbarëkombëtare të enjten. Flamujt kombëtarë u ulën në të gjithë vendin, trafiku në të gjithë vendin u ndal në mesditë dhe sinjalet u dëgjuan nga anijet dhe trenat.
Duke folur në një konferencë shtypi të mërkurën, presidenti i Azerbajxhanit Ilham Aliyev tha se moti e kishte detyruar aeroplanin të ndryshojë nga kursi i planifikuar.
Çfarë thonë ata për një shkak të mundshëm?
Autoritetet e Kazakistanit, Azerbajxhanit dhe Rusisë thonë se po hetojnë aksidentin. Embraer i tha Associated Press në një deklaratë se kompania është “e gatshme të ndihmojë të gjitha autoritetet përkatëse”, transmeton Klankosova.tv.
Autoriteti i aviacionit civil të Rusisë, Rosaviatsia, tha se informacionet paraprake treguan se pilotët u devijuan në Aktau pasi një goditje e shpendëve çoi në një emergjencë në bord.
Disa komentues pretenduan se vrimat që shihen në pjesën e bishtit të aeroplanit të fotografuar pas rrëzimit, ndoshta tregojnë se ai mund të ishte vënë nën zjarr nga sistemet ruse të mbrojtjes ajrore që shmangnin një sulm me dron ukrainas.
Osprey Flight Solutions, një firmë e sigurisë së aviacionit me bazë në Mbretërinë e Bashkuar, paralajmëroi klientët e saj se “fluturimi i Azerbajxhanit Airlines ka të ngjarë të ishte rrëzuar nga një sistem rus i mbrojtjes ajrore ushtarake”. /Klankosova.tv
