Ricardo Kaka ka rindezur entuziazmin te tifozët e AC Milan, duke mos përjashtuar mundësinë e rikthimit në klub si trajner në të ardhmen. Në një intervistë për “La Gazzetta dello Sport”, ish-ylli brazilian foli për derbin ndaj Interit dhe garën për Scudetton, duke u bërë thirrje Rossonerëve të besojnë deri në fund.
Kaka zbuloi se është duke u përgatitur për një karrierë menaxheriale, pasi ka studiuar menaxhim sportiv në Harvard dhe ka ndjekur kurse të FIFA-s e UEFA-s.
“Kam pasur mentorë të shkëlqyer: Berlusconi, Galliani, Braida, Leonardo, dhe në Madrid edhe Florentinon. Marrëdhënia ime me Milanin ka qenë dhe mbetet e veçantë”, tha ai.
Duke folur për derbin e 8 marsit, ku Milan dhe Inter ndahen nga 10 pikë, braziliani nuk e sheh të pamundur rikthimin në garë për titull.
“Jemi dhjetë pikë prapa, por them se mund të bëhet, madje edhe për Scudetton. Në futboll kam parë shumë dhe besoj se derisa ekziston mundësia, duhet të luftohet”.
“Me gjithë respektin për kundërshtarët, ndeshje si ajo kundër Parmës në shtëpi duhen fituar”.
Mesazhi i tij përfundimtar për Milanin: “Besoni dhe luftoni deri në fund”. /Klankosova.tv
●●●
ASHKRIMI NGA
A
Editorial nga Klan Kosova — ndjek sport dhe zhvillimet e tjera kryesore të vendit.
