Ka nisur takimi i Grupit Punues për Vizat në Këshillin e Bashkimit Evropian (VIDEO)

11:26 Nis takimi dy ditor i Grupit Punues për Vizat në Këshillin e BE-së Në ora 10:00, në Bruksel, ka nisur takimi dy ditor i Grupit Punues për Vizat në kuadër të Këshillit të Bashkimit Evropian. Me 12 e 13 tetor grupi diskuton për disa çështje në mesin e të cilave është liberalizimi i vizave për Kosovën. Ky organizim evropian do të diskutojë një të ashtuquajtur non-paper që do prezantohet aty nga Komisioni Evropian. Në dokumentin që ka pasur qasje Klan Kosova, e i cili s’është publik, thuhet se komisioni i qëndron prapa raporteve që i bëri më 2016 e 2018, që konfirmojnë përmbushjen e kushteve për heqjen e regjimit të vizave. Vendimin final për liberalizim, pas kryerjes së procedurave paraprake, e merr Këshilli Evropian (KE) me shumicë të kualifikuar, transmeton KlanKosova.tv. 07:05 Nga sot Këshilli Evropian e nis diskutimin për liberalizimin e vizave për kosovarët (VIDEO) 12 tetori pritet të jetë një ditë speciale për Kosovën në Bruksel. Në kryeqytetin e Bashkimit Evropian, së pari kolegji i komisionarëve pritet të miratojë raportet e progresit për vendet aspiruese për të hyrë në BE. Në disa fusha raporti do jetë i ndryshëm për Kosovën, por tek liberalizimi i vizave Këshilli Evropian i mbetet besnik qëndrimit të vitit 2018. KE-ja thotë se regjimi i vizave për kosovarët duhet hequr, dhe se kushtet janë përmbushur. Mbi këtë raport dhe të ashtuquajturin “Non-Paper” grupi punues për vizat, po në Bruksel, do zhvillojë punimet të mërkurën e të enjten për liberalizim. Derisa të mërkurën e të enjten, punon grupi për vizat, të premten më 14 tetor mblidhen ministrat e punëve të brendshme të unionit, më saktësisht Këshilli i Shengenit. Lëvizja e lirë për shtetasit e Kosovës nuk figuron si temë diskutimi. Njoftimi zyrtar thotë se aty flitet për situatën  e përgjithshme me fokus të veçantë në menaxhimin e kufijve të jashtëm dhe se do vendosen veprime në këtë fushë. Vendimin final për liberalizim pas kryerjes së procedurave paraprake e merr KE-ja me shumicë të kualifikuar. https://www.youtube.com/watch?v=B-67uVMtWeg